Tesüiba küm 22 nung Gujarat jenjang tamajungba kümogo: Chidambaram

New Delhi, November 19 (Agencies): Gujarat terenlok model dak sendakba nung BJP aija Deobarnü taoba mapang Union Finance Minister aser Congress lenir tain, P. Chidambaram-i, terenlok tangatetba tai ajanga nisung aika tesülen atsüngzükogo aser tesüiba küm 22 nung Gujarat jenjang tamajungba kümogo, ta aitsü.
Iba kuliji sayua Congress lenir, Chidambaram-i twitter ajanga Gujarat den state pezü- Karnataka, Tamil Nadu, Kerala aser Maharashtra medemdangba data ka lemsatep.
“Iba data ajanga Gujarat-i asüküma jembiyonga terenlok maliba sayur. Item state pezü dang nungi Gujarat tajungtiba masü. Gujarat ji industry nungbo renlokogo, ajisüaka tesüiba küm 22 nung tongtibang lenla aika nung Gujarat jenjang ajema aluogo,” ta metetdaktsü.
Ano tanga tweet ka ajanga pai, “Terenlok tangatetba tai ajanga nisung aika tesülen atsüngzüka luogo,” ta ashi.
1995 küm jakdangbo Gujarat ji national growth average dang nungi timba liasü, ta shia Chidambaram-i, “1995 küm jakdangbo Gujarat indang growth rate ji national average dang nungi timba liasü,” ta ashi.
Paisa, Gujarat nung taruba assembly elections ji rongsenkettsüng aser loktiliba atema tenangzükba nung ajemdaker agitsü, ta ashi.
2014 küm Lok Sabha election mapang nung Ato kilonser, Narendra Modi-i Centre-i kümshia mapa crore 2 adokdaktsütsü ta alia nangzükba, bendanglen nungi black money bener arutsü aser India nunger shia bank account nung sen lakh 15 inoktsütsü ta nangzükba aija Chidambaram-i, “Atangji, item tenangzükba ka danga matalok. Anungji ita 42 (sorkar yimsüsüba) sülena lenla ajak nung melung masü lir. December ita election agitsü aliba state, Gujarat nunga kasa melung masü lir,” ta ashi.