Texas tenla ki ka nung nisung 27 khaset, 20 yiru

Houston, November 06 (Agencies): US kübok Texas state nung aliba Baptist arogo ka indang tenla ki telungi nisung ka prangbong bener aita injang khaloktsüba lendong nung nisung 27 asü aser 20 yiru, ta ketdangser osang ajanga ashi.
Iba lendong agütsüsang ya Devin Kelley, ta jangjaogo aser pa ya lendong agütsür mapang talangka melie sür lia angu. Iba arogo nung sannüker’er jala arishi küm 14 tain ka densema nisung aika taküm sama.
Wilson County kübok Sutherland Spring Khristanpur indang tenla kidangi prangbong teperi bener nisungba ya Deobarnü aita sentepa alirtem dak injang khaloktsü tenzük, ta iba tesem nung osangbener ajanga ashi.
“Lendong agütsüsang ya temesüng nisung aser arishi küm 30 majung alitsü südi. Pa süoshi ajunga tanak, prangbong aser injang teperi bener aser ballistic vest ka sema liasü,” ta Texas Department of Public Safety nung regional director Freeman Martin-i ashi. Lendong agütsüsang ya mapang tatsüka lir tasü ngutet aser pa kabu nung “Ruger AR assault-type rifle” ka liasü, ta Freeman-isa ashi.
Osang ka ajanga ashiba agi Kelley ya 2010 aser 2014 mapang US Air Force nung inyaka liasü. Pa ya mapa nungi anendaktsü aser May 2014 nung pa anema mitkartem indang obendangdak ken o benoka jembia liasü. Kelley asoba anogo ya February 21, 1991 lir aser iba lendong agütsüba nükjidong ya anu mejangjateti lir.
Lendong agütsüsang ya police temi khaset asü mesüra pa-sasa khasetar anu mejangjateti lir.
Anüngdang teroto atongtsü anasa nisung 50 shi iba tenla ki nung tekülem agiba mapang lendong agütsüsang ya tenla ki telungi aita injang khaloktsü aser iba mapang yirur rongnung arishi küm ana tain ka densema liasü, ta Dallas Morning News website ajanga ashi.
“Iba lendong nung asürtem 27 rongnung iba arogo sannüker Frank Pomeroy’er jala Annabelle densema lir,” ta Wilson County Commissioner, Albert Gamez Jr.-ia ashi.
“Iba lendong adalokba mapang ni tenla kidang meliasü. Saka ozü jala tanutsüla, Annabelle bo liasü,” ta Pomeroy-i osangbener dang ashi. Lendong nung yirur rongnung parnok ter bo trauma hospital-i bener ao, nisung ka San Antonio military centre-i tayimtsü nung bener ao aser tanüngba yirurtem ya anasa aliba mozüki-i anir ao.
Linük Tir Donald Trump, shiba hopta ana East Asia linüktem semdanga jajaba mapang lir, pai-a iba lendong ajanga kongshirtem den tejashi aser asükhu lemsatep.
“Sutherland Springs, Texas nung aliba nüburtem den Tsüngrem dena liang. FBI aser ozüng amshirtem iba tesem nung lir. Iba densa ni Japan nungi metetbelar,” ta Trump-i tweet ka nung ashi.