Theresa May-i billion 9 jenjang atema tezüngzüktep agi

Shanghai, Feb 02 (Agencies) : Tan hopta nung United Kingdom Ato Kilonser, Theresa May-i China lima semdangba mapang sen 9.3 billion pounds (US dollar billion 13.26) jenjang tezüngzüktepba yangluogo, ta tanü Hokolbarnü British sorkari metetdaktsü.
International Trade Secretary, Liam Fox-i ashiba agi, “Item tezüngzüktepji tan hopta nung renemogo aser item jenjangji billion 9 (pounds) dak tema asütsü; British nungeri yangluba osettsüset aser nübu nüngdaker ta asüba iba tezüngzüktepba jagi sayur.”
“International economic department ka ama, onoki jenjang tulu aketba tesendaktep ya maneni akangshia bener aotsü; iba ya ajanga shishilembabaren tsütsü kümshi British company-tem pounds billion 59 shi jenjang nung tajangzük angur,” ta Fox-isa metetdaktsü.
Maneni tezüngzüktepba tasen yanglur asünung, ano jenjang temaba nung inyaktettsü, ta British nungeri bilemdagi.
Britain nunger ‘financial services industry’ asoshi deals, market access, aser mapa 890 amala asoshi sen pounds billion ka dak tema mekazüka yua lir.
Anogo asem sülen May-ji tanü Hokolbarnü China nung commercial capital Shanghai yimti toktsü meyipa ogo.
European Union toktsütsü atema 2016 küm referendum agia telemtetba agiba sülen tang parnok ya alima ajungalen awaloka oagi shishilembabaren inyakba linük ka kümdaktsütsü asoshi Britain-i merangdar.
Britain-i EU toktsütsü lemtetba (Brexit) ajanga Beijing-i tasü meiti bilemer dang ashi, London-ibo alima nung economy tulutiba rongnung tanabuba (China) den kecha talenba ka makai shishilembaba nung tezüngzüktep ka agitsü teimla tulu nung lir, ta kasa osang ajanga metetdaktsü.
EU toktsütsü lemtetaka Britain den China nunger tesendaktepji manokshitsü, ta tan taoba Bodhbarnüto China ato kilonser, Li Keqiang-i May dang shiogo.