Timtem ajak adokdaktsüba tetsütiji kiralongra lir: Sushma

New Delhi, Aenjeti 17 (Agencies): Kiralongra dak sendakba mapa ajak aija tanü Minister of External Affairs, Sushma Swaraj-i, lokti atema amokmeren tulutibaji kiralongra lir, ta metetdaktsü.
Tanü New Delhi nung ayongzükba Raisina Dialogue 2018 sentong nung jembidang lai, “Tanübo timtem ajak indang tetsütiji kiralongra lir. Küm ishika tsüngda asenok matsüngdang kiralongra tebilemtsü adok. Tanü ama digital putu ka nung kiralongra ya kanga süoki ia agitsüsa tebilemtsü ka lir,” ta ashi.
United States nung 9/11 Twin Tower amakba tatalokba metetdakja lai, “Joko tangbo tesem ajak nung kiralongra ajanga lokti tentettem amokmerenba asenok ajaki meteta lir. 9/11 amakba sülenbo asenoki kiralongra ya yimsü masüba tentet den dendaktsür,” ta lai metetdaktsü.
Tanep Army Chief, General Bipin Rawat-i, telungpurtemi nuclear raraba oset angur, aser iba tetezü, meimchir atema lendong, ta ashi.
Kasa sentong nung jembidang General Rawat-i, “Telungpurtemi nuclear aser chemical raraba osettem angubaji meimchir atema lendong asütsü,” ta ashi.
Paisa, kiralongrar teloktem pusemba linüktem sendoktsüla, ta ashi.
“Kiralongrartemi International arrtsülen technology tajung amshia inyaker. Item teyari agütsüba linüktemji jangjatsü nüngdak,” ta paisa ashi.
Raisina Dialogue 2018 sentong ya Mongolbar nikongdang New Delhi nung tenzüka liasü aser iba sentong tetenzük nung Israel Ato kilonser, Benjamin Netanyahu aser Union Minister, Jayant Sinha natia ajembia liasü.
Kasa sentong nung Union Minister Smriti Irani aser Commerce & Industry Minister, Suresh Prabhu natia jembi.
Iba sentong tasemnübuba nung General (Retd) VK Singh, Minister of State for External Affairs aser taoba mapang Afghanistan Tir, Hamid Karzai nungeria shilem agitsü.

You must be logged in to post a comment Login