Timtem School : Rom 8:36-39

“Au, shiri Khrista Yisu dak akhüm tsübua liner parnok ajaki rishikangshi angutsü.” (2 Tim. 3:12).
Khristan shinga timatemba school nungi kümzüka mali. Ibai Tsüngrem sentong nung shilem tesadang ka lir. Yisu temang aser tekolok timatemba ama Yob timatem. Yobi timtem koda agizük iba indang bushiba ajanga asenoki tajangzük akaba lesson angazüktsü.
Yobi kechisarena asoshi pa timatemba dena Tsüngrem nem tenüngsang agütsü. Pai ashi, “Ni kütsü pok nungi mangsa aru, aser ilen jagi mangsa aotsü. Kibubai agütsü aser Kibubai bener aor. Kibuba tenüng moajang.” (Yob 1:21).
Yobi ashi pa dak kechisa ataloker Tsüngremer temoatsütem lir, Pa ket nungi agizüker. Yobi ashiba Tanela Temeshi-i agütsü aser agizük. “Ya ajak nung Yobi temenen memena, mesüra mashi Kibuba dak matong” (t.21). Ajak nung Kibuba nem tenüngsang agütsütsü asenok dang ajungshir (1 Tesa. 5:18), aser asen nüngdak Pa dang ashitsü (Fil. 4:6).
Yobi ashir, “Asenoki Tsüngrem nungi tajung dang agizüktsü, tamajungba magizüktsü asü?” Tsüngremi asenok taküm nung agütsüba ajak asenoki agizükdang mapa ajak tajung asoshi külemi inyaker ta asenoki angutsü (Rom 8:35-39).
Pa kanga mejungi atitangba aser timatemba tiyalung nung Yobi pa tembartem dang ashibaji ajiang, “Kü dang sayuang, ni mokorai lidi, aser ni kong aibelener aji angatetdakjang. O shitak koda tashi tait; saka nenoki arütsüba nung kechi tashi ali?” (Yob 6:24-25). Pa tembartemi mesüneptsü dang Yob ajemaluba nung ainba iba yagi sayur. Asenok mepiriba/ anünga aliba peridaktsütsü asoshi Tsüngremi timtema yoker. Asenoki mokorai kong tamakok lir bushitettsü merangtsüla aser asenok sasa melenshitsüla.
Yobi pa timatemba mapang Tsüngremi pa dang tajung inyakba ajak meyipa reprang, aser pa kanga metemsüba angateta aru. Tsüngremi nisung koda anebalur aji shisadanga pa ajep aser asüngdang. “Na ulutsütsüsa, aser Nai pa dak temulung agütsütsüsa, nisunga kechi? Aser anepdang shia nai semdangtsüsa, aser mapang shia tendangtsüsa nisunga kechi?” (Yob 7:17-18). Asenokia asenok kanga tila aser Tsüngrem anüngtem dang nungia talangba ta angatetdi (1 Korint 15:9-10; Efesa 3:8).
Kotak nung aliba Oba, Nai ni tajungtiba kümdaktsütsü tendanger, saka tamakok nung meyutsü ta angatettsü yariang. Amen.