Tongpang Ozukum-i yim balala nung declaration agutsü

Mokokchung, Tsüklai 17 (TYO): Tsüklai 17, 2018 nü 24 Angetyongpang A/C nungi Independent candidate, Tongpang Ozukum-i iba constituency kübok yim balala nung pa election nung tokteptsü atema sangdongogo.
Tongpang Ozukum ya taoba mapang Naga Students’ Federation (NSF) Tir lir, aser Mongsenyimti yim nungi lir. Taruba election nung lanur candidate tem rongnung pa tanubur ka lir.
Yaongyimti Old, Yaongyimti New, Phasang Town aser Longkong yimtem nung declaration agutsüdang pai constituency atema pa tebilemba onüktem aser tenangzükbatem metetdaktsü.
Yimtsüng balala nung jembidang Tongpang Ozukum-i 24 Angetyongpang A/C nung vote agusütsüpurtem dang Nagaland Legislative Assembly nung züngsem ka asutsü atema pa nem maongka agüjang, ta mepishi.
Pai ashiba agi, ochimashi atsüdoktsü aser Naga nunger taginüba ama temelenshi bener aruba nung paia shilem agitsü atema election nung tokteper, ta metetdaktsü.
Pa nem dang maongka agütsüra pai gari lenmang, tzü supply aser electricity ama nüngdak rongdaktem atema inyaktsü, ta Tongpang Ozukum-isa metetdaktsü.
Tongbangba-isa, iba constituency menden atema nüboji Tsüngremi dang shimtettsü, aser iba constituency nung shibai takok ngudir nguaka ibaji Tsüngremi melungba asutsü, ta ashi.
Iba dak sendakba nung pai, pa shimra pai kodanga nüburtem tenüng nung shimba akhümketji mesendoktsü, saka nüburtem atema inyaktsü, ta shisem.
Kasa sentongtem nung taoba mapang MLA, Limatemjen, Mongsenyimti Village Council chairman aser tangartemi jembia liasü.