Tongpangtem Rarar (T.Ken 60: 1-12)

Tebilemtsü ka bentetli, ano ka tenzükli ta maneni aor. Dawidi iba züluba mapang pa taküm nunga iba tebilemtsü lia zülu. Pa tongpang kati aor aser ka asoshi sarasadem. Ne tongpang rara nung Dawidi iba ken nung telangzüba pezü agütsüba amai anidakang.
Mezüngbuba, pai tiaji ladang (t.1-3). Dawidi teti tiaji sangro zülur tenük ajanga ladang. Pai tia noksaji ajungben tzümetsüng, menoknok aser yi agi meseper alir nübur den medemdanga zülu. Moab nunger alinük amakbaji Tsüngremi nokdangtsü ta Dawidi bilem, saka pai parnok arutsü mela. Idangji Dawidi Kibuba dang tai atoktsü mepishi aser tzümetsüng nungi nüburtem anendaktsütsü mepishi. Yihuda nungeri tenemtem aser alimaji akanga lir ta bilem, saka Dawidi alima ajak anokshir aser jaksaa aor ta bilem. Pai nüburtemji yi agi meseper mangazüteper ama angu. Ain adoka obendangba marok, arua lir. Dawidi tiaji ladang aser ashi, “Mapatemji tamajungba arutsü asü ?”
Tanabuba, pai Tsüngremer ochiba nisanji atsüket (t.4,5). Dawidi iba tongpang rara kechiaser pa Tsüngremer chuba aser nüburtemji Tsüngremer nübur liasü. Asenok taküm nung tongpang rara liaka, aser tatsütep aser tetoktep liaka Tsüngremi maneni asenok meimer ta asenoki bilemtettsüla (Rom 8:35). Pa temeim melenshitsü makok aser tamakok malutsü, asenoki kechi bilemer kecha masü. Dawidi Tsüngremer ochiba nisan ajungket.
Ibaji Tsüngrem tenüngtem rong nung ka lir: “Kibuba kü Nisan lir” (Anitet 17:15). Dawidi koka dang liasü, saka pai Tsüngrem teka tachichi nung nendaka. Kibubai Pa sepoytemi Pa nisan meketa jaten.
Tasembuba, pai tanishir dang anga (t.6-8). Dawidi paji tanabuba tanishir ta meteta liasü, kechiaser, Israel army nung Tsüngremji Walunisang liasü. Tsüngremi ashi, “Israel nung na kongisa odir, ajakji kü meyong; alimaji Ni agi. Anungji shisa tebulu.” Kodang tanishiri yamaji jembiba Dawidi angashi, pai tsübutsü mali ta pai metet. Kibuba takokba nung pa anisüngzük (1Kor. 15:58).
Tatemsa, tamang agi pai apuso (t.9-12). Dawidi ashi, “Ni küsasa dak temulung malemer. Takoksang Tsüngrem teti asenok jakdang aor. Pai asenok nem teyari aser takok agütsür” (T.Ken 118:8).
Shiba tashi nung na aor, Kibuba tashi mesüra ne tashi nung takok mesüra tamakok lemtettsü.