TRAI-i IUC ajemtsür; Mobile bill dalangba akümtsü

New Delhi, September 19 (Agencies): Mongulbarnü Telecom Regulatory Authority of India (Trai)-i interconnect usage charge (IUC) minute ka nung poisa 14 nungi poisa 6 ajemogo aser iba ya October 1, 2017 nungi mapa küma amshitsü.
Maneni, January 1, 2020 nungi no call termination charge tenzüktsü, ta Trai-isa metetdaktsü.
“Sendaktepa alirtem nungi tebilembatem lemsatepba sülen Authority-i domestic mobile termination charges meyipa reprangshiogo” ta Trai-i sangdong ka nung metetdaktsü.
Telecom operators-i tanga network nungi aruba incoming calls nung IUC agir aser ibaji subscribers dang nungi agir.
IUC ya Telecom Regulatory Authority of India ajanga latettsü. Tang IUC ji mobile phone nungi call asüba nung poisa 14 agir.
Bharti Airtel-i anir telecom operator kari Trai dang termination rate ji ajungkettsü atema asüngdanga liasü saka Trai-i ibaji magizüki ajemtsüogo.
Külen, Reliance Jio-ibo consumers ajangzüktsü atema IUC jenjang ajemtsüla ta Trai dang shia liasü.
Reliance Jio-i Trai nem agütsüba shidi ka nung telecom operators-i IUC nung sen croe lakh 1 ajangzüker ta shia lir.