Tripura nung Congress MLA ka disqualify sütsüogo

Agartala, Aenjeti 12 (Agencies): Tripura nung ponguben tashi Congress legislator inyaka alisang, Ratan Lal Nath, shibai taoba ita Bharatiya Janata Party (BJP) nung oa aden, pa anti-defection law kübok assembly züngsem samar, ta Speaker Ramendra Chandra Debnath-i Rogonü ashi.
“Ratan Lal Nath-i Luchii (December) 22 nung Congress toktsür BJP nung oa adenba ajanga pa indang assembly membership ya iba anogo nungi linük temzüng indang Scheduel 10 (koba ajanga anti-defection law indang ashir) disqualify sütsüogo,” ta Debnath-i Rogonü iba tutuyuba agütsüba sülen ashi.
“State Congress Tir, Birajit Sinha-i tezüluba nung Nath-i BJP dangi aoba osang ya MER nem agütsü aser pa assembly züngsem nungi agientsü atema takhangba agüja liasü. Iba ken o angadangba nung arua adentsü asoshi pa (Nath) nem anaben tashi osang agütsüogo. Saka Nath-i pa temang majung, ta osang agütsü,” ta Debnath-i ashi.
“Osang tejangja aliba densema ni Nath anentsütsü asoshi telemtetba agi. Ibai Tripura otsü nung mezüngbuba süa tang temendak alir MLA ka anti-defection law kübok disqualify sütsür,” ta pai ashi.
Speaker-i iba telemtetba agiba pela agizüka jembidang, Tripura Congress Vice President, Tapas Dey-i, “Pai ajangzüktsü asoshi lenmang bushiba yimden yimsüsürtem ya agientsüla aser jenjang tajung amshiba yinden yimsüsürtem ayutsüla,” ta ashi.
Ita eshika party nung ketdangsertem den ajuruteba asameyanga aruba sülen, Tripura assembly nung taoba Opposition Leader, Nath-i taoba küm Luchii 22 nung BJP General Secretary Ram Madhav, Assam Ministers Himanta Biswa Sarma aser Parimal Sukla Baidya, Tripura BJP Tir Biplab Kumar Deb aser party lenir aika lia BJP nung oa aden.
Arishi küm 71 tain Nath-i 1993 küm nungi tenzüka Congress nung menden aika nung mena aru, aser Tripura anülulen aliba Mohanpur assembly constituency nung Congress candidate ka ama ponguben tashi shimteta liasü.
Iba ajanga Tripura assembly nung Congress nungi züngsem ter aliba nungi ana dang kümogo.
State assembly nung Communist Party of India-Marxist-i aniba Left Front züngsem 51 lir aser item rongnung legislator 50 bo CPI-M nungi lir.
Nath densema MLA troki Congress toktsür Trinamool Congress nung oa aden aser iba sülen BJP nung oa aden. Parnoki linük tir atema taoba küm Chiteni (July) 17 nung election agiba mapang National Democratic Alliance nungi shimtetba Ram Nath Kovind nem vote agütsü.

You must be logged in to post a comment Login