Tripura nung shiri sorkar akümtsü ?

Tsüklai 18, 2018 nü Tripura nung Assembly election agitsü aser Tripura nung tan election ya kanga dang tesashi ka asütsü. Tripura nung pezüben tashi chief minister inyaka arur Manik Sarkar-i aniba Left Front sorkari tesüiba election tem nung iba amai tayongzükba majurudangi aruogo, kechiyong taküm election atema BJP-i CPM den kanga dang tekong meranga toktepyonga arudar. Telok ana tsüngda yimyim agütsütepa aruba nung BJP-i terenlok mapa inyakba aser CPM-i yimjung bener aruba indang lir. Maneni, küm 20 tashi telok kati dang sorkar ketdangsüa aruba agi lakogo ta jembiba onük den ano Prime Minister Narendra Modi-i anir tongtipang nisungtemi BJP atema nübo yimtsüba ajanga Left Front sorkari temulung ila bilema alitsü ama ajiteter. Left teloki sorkar ketdangsüba state tatembangji Tripura lir kechiyong parnok West Bengal nung opposition nung lir aser Kerala nunga parnoki taruba sorkar akümtsübaji tasak asütsü. BJP-i Tripura nung takok tajung angutsü ama parnoki bilemer. 2013 küm parnoki Tripura nung vote noklang nung 1.5% angu, saka Manipur nung takok anguba aser central aid agütsütsü ta nangzükba ajanga takümbo parnoki vote aika angutsü imlar. Külen Left puri Sarkar-i tashishitsü melii pa taküm liyonga aruba nung ajemdaker BJP anema takok angutsü imlar. Sarkar-i Tripura nung lisopurtem aser Bengali oshi jembir tsüngda tesentaktep junga yutettsüsa mapa inyaksangshia arur. Pa lenisüba kübok Tripura nungi telungpur khuret azüoktet aser iba jagi 2015 küm Armed Forces Special Powers Act (AFSPA) ozüng dena agiena liasü. BJP-i Tripura nung terenlok indang osang prokshir aser Left-i yimjung indang osang prokshir, saka ajak dang tongtipangbaji telok anati teküpoktiba jenjang nung kechi koma mapa inyakteter aser nisungtem mesüzükteter ta asüba nung dang takokji ngutettsü. Left teloki parnok züngsem aika aliba dak temulung alemer aser külen BJP-i lisopur indang vote angutsü ta temulung ulur. Tripura state nütsüng yongsük nung lisopur shilem 30 shi lir. Iba jagi parnoki NC Debbarma-i aniba Indigenous People’s Front of Tripura telok den tesentaktep yanglu. Tribal Autonomous District Council nungi autonomous state council ka kümdaktsütsü ta BJP-i nangzükba sülen IPFT den election nung yariteptsü tenangzükba agitep. BJP-i tanga state election tem nungbo nübo teimba alirtem dak temulung agüja mapa inyaker saka Tripura nungbo parnoki telok tila dak temulung agüja mapa inyaker. Ano külen, Tripura nung BJP tashi itta makümdang opposition tongtibaji Congress liasü aser tan election nung parnoki Tripura nung Maharajah Pradyot Kishore Manikya toktepdaktsür. Pa ya Tripura Congress nung working president teinyakdak lir aser iba jagi lisopur vote aika pa dangi aotsü akok ta bilemer. Talisa yaküm Luchii ita Tripura Congress züngsem 1,000 shi party nung tanaben aden. Parnok ya 2016 küm Congress toktsür Trinamool Congress nung aden saka tanaben Congress-i meyipa aru aser tan election nung parnoki jenjang tajung angutsü teimla ayur.  Aji agi, taküm Tripura assembly election atema CPM-i tera arentaka bilemer, BJP-i takok angutsü ta pelar aser Congress-i maongka kar agitsü imlar.