Trump Aser North Korea

Tang alima nung makmakshishi jenti aliba den külemi kiralongrartem tebilemtsü, alima tatsükba akumba, chiyungtsü tebilemtsü, sensak tia aser ayawara densema tayongzükba onük aika, koba anga meinyaki alidang North Korea’er nuclear sentong ajanga alima nem tebilemtsü tulu bener arutsür. N Korea-i kodang ang kechi inyaktsüar memetetba tensa ka nung asenok lidar. Joko küm aika N Korea-i nuclear raraba oset jenti yanglua rizünger, aser ibaji anema alima linüktemi ola adoker. Joko N Korea-i United States tonga khaloktsütettsüsa long-range missile-a yangludar. Taoba US Tir, Barack Obama-i N Korea anema kecha meinyaktet saka tang teinyakdak Tir, Donald Trump-ibo iba tebilemtsü atema kanga nüken-belema inyaka arudar. Trump ya kanga tetoktak lenir ka lir, ibayongji US-i N Korea’er nuclear programme anema kechi inyakdir, ta alimai kanga tsüremseta repranga atar. Tamalen Trump-i, N Korea tebilemtsü atema China-i meinyakra US kijai asüyonga inyaktsü ta shiogo. US-i N Korea indang raraba oset ajakbo meraksattsütettsü, iba den külemi tangbo N Korea ket nunga mobile launch lir, anungji nuclear rara tenzükra N Korea-i South Korea aser Japan nung tongtibang yimtitembo aoyi küma samatsütsü. Mongolbarnü N Korea-i Japan linük adena missile ka khadokba sülen US-i N Korea amokmeren, aser iba dak sendakba nung N Korea-ia Japan dang US den longjemer inyakba atema amokmerenogo. Mongolbarnü Japan adena N Korea-i missile khadokba sülen Japan Ato kilonser, Shinzo Abe-i ibaji sashia aitsü aser US Tir den maneni N Korea anema longjemer inyaktsü bangjem. N Korea lenir, Kim Jong-un-i ‘missile tendangba ya tetenzüker ka dang lir, ano aika tendangtsü’ ta shiogo. Ano külen Russia-ia US-i N Korea anema tashiyim amshir, ta shia US amokmerenogo. August 30 ayaterm nung Russia Foreign Minister, Sergei Lavrov-i phone ajanga US Secretary of State, Rex Tillerson dang ‘North Korea anema tashiyim mamshitsüla, mitkar tashi mamshitsüla, aji oda inyakra mejangjaba lendong tulu adoktsü’ ta amokmeren. N Korea-i United Nations temzüng alema Japan linük adena intermediate-range Hwasong-12 missile khadokba sülen US Tir, Trump-i joko mitkar tashi amshitsüsa oren ka jembiba sülen Russia-i US dang tekümdangtsü o shia amokmerener. Brihostibarnü US-i N Korea dang mitkar tashi sayua South Korea nung bombers aser stealth jet fighters amshia drill exercise agi. Trump-i pa kijai tashi amshitsü südi ta aikati arendaka bilemer. Linük kari nuclear amshitsü amokmerenaka alima meimbayong tashi aliba linüktemi aremzüka yimjung atema dang inyaker, saka Trump-i maremzükteti mitkar tashi amshira alimai matitsü. N Korea-i tekong meranga mapang shia missile tendangba ya UN mezüngmeshiba mapa ka lir, aser ibaji ajanga tanü alima nung teinyaktsü tebilemtsü onük aika liaka N Korea ajanga alima lenirtem kanga nüken belemdaktsür. US-i N Korea amaktsü tenzükra South Korea aser Japan na tamajungba akoksatsü, anungji N Korea-i tekong merangaka alima linüktem atemabo US-i aremzükbasa tajungba asütsü.