Trump-i Africa nungertem tiluja jembiba aitsür

Washington, Jan 12 (Agencies) : US nunger ozüng yanglur kari Haiti aser Africa linüktem nungi aruagi aliba nüburtem kümzüka ayutsü meranger ta US Tir Donald Trump-i jashia metetdaktsüogo. Aji oda süaka, kechiba yamala linüktem nungi aruba nüburtem America senso küma lidaktsütsü ta pai jashia jembibaji telok balalai aitsüogo.
Asia kübok linük kar shirnoki America nunger rongsenren tsütsü yarir, parnokang aruagi senso küma lidaktsütsü nükjidong nung Trump-i tatartem den ajurua jembi.
“Kechiba item nüngdak makaba linüktem nungi arurtem yangi lidaktsür?” ta Trump-i jashia jembibaji osangbener aikati prokshiogo.
Haiti aser Africa linüktem nungi aruba nüburtem tiluja jembiba mapang, US nungeri Norway amala linüktem nungi aruba nüburtem pela agizüktsüla, ta US Tiri tetuyuba ka agütsü. Tan taoba Bodhbarnü Norway ato kilonseri Trump den ajurutepa liasü.
Aji oda süaka, tang Trump-i tim mesüi jembiba indangji Democratic telok nungi ozüng yanglurtemi aitsüba olen ka mezüngbuba Washington Post osang ajanga sangdong.
Rongsenren tsütsü parnok yarir ama bilema Asia linüktem nungi aruba nüburtemang tali nendaka reprangtsüla, ta Trump-i ashiba olen ka White House nungi ketdangser kati metetdaktsü.
“Washington nungi yimten lenir karibo bendanger linüktem yaritsü mulunger saka Tir Trump-ibo America nungertem atema teti nokdaktsü,” ta Trump-i ashiba mesüaka Principal Deputy White House Press Secretary, Raj Shah-ia olen ka shisemogo.
Kasa osang ajanga ashiba agi, linük kar nungi aruagi aliba nüburtem mapang tatsüka atema kümzüka ayuba ya Trump-ibo agientsü meranger.