Tseminyu bandh tiptema agiogo

Kohima, Aenjeti (January) 13 (TYO): Nagaland state sorkari Tseminyu district kümtettsü takhangba asoshi kecha meinyakba atema tejashi nung Rengma Selo Zi (RSZ) aser Rengma Students’ Union (RSU)-i tanü nungi National Highway-2 mokdang tenzükogo.
Rengma Hoho-i taoba mapang nungi Kohima district kübok aliba Tseminyu sub-division balaka razüka aotsü aser district headquarter ka tentettsü atema takhangba agüja aru. Yaküm Khristmas atongtsü lia state sorkari Noklak district jenjang nung ajungketba sülen Rengma nungertemi Luchii (December) 26 nungi district balaka akümtsü takhangba agüja lungkak aittsü tenzük.
Sorkari telangzüba tajung agütsütsü ta teimla nung aser amanga Rengma nungertemi mokdangba anena liasü saka sorkari zübazüba toktsüba atema tejashi nung parnoki tanep 10:00 ako nungi National Highway-2 mokdangtsü tenzük.
“Sorkari Rengma nunger mezüngokba atema kanga mepelar aser joko sorkar Rengma nunger hao ta mali ama bilemer” ta Rengma Selo Zi tir Kenneth Kath-i ashi.
State sorkari election masü telatetba ka atema maparen inyakba angateta aser onoki takhangba agütsüba bilemdangtsü atema mapang peria dang agütsü saka tanü tashi Tseminyu district kümtettsü atema mebilemer, ta RSZ aser RSU lennirtemi metetdaktsü.
Iba jagi RSZ aser RSU-i lungkak aittsü telemtetba agi aser iba atema tebilemtsüji state sorkari abentsü, ta parnokisa shisem.
Taoba mapang mokdangba dang nungi tang ya tesashiba lir aser tangbo ‘very emergency cases’ dak alaka shinga mesenzüdaktsütsü ta RSZ aser RSU lennirtemi ashi.
Lungkak aitba ajanga public nem timtem agütsüba atema sasa bilemer saka Rengma nungeri mapang talangka tejakdang nungi Tseminyu district kümtettsü atema takhangba agüja aruaka telangzüba kecha mongui dang arur. Anungji nübortemi Rengma nunger pusema nungittsü aser yariteptsü mepishir, ta parnokisa shisem.