Tsükchir Tsüngda Putepshiba

Alima nung nisung kija alitsü majunga ta bilema Tsüngremi tebur aser tetsür yanglu aser Pai ozüng agütsüba ama, meimchirtem soyapokyaa jenti rena aotsü tenzük; idang nung jagi meimchirtem lokti nung külemi ali aser ibaji meimchirtem lokti nung alitsü tetenzüker liasü. Atangji asenok lokti shirurutem asünung, kati ka yaritepa alima nung külemi lia aor saka lia aodang memeteti nisung ana tsüngda mangatettep adoker aser mapang shidak nung atsüanem katepa meyanglushira tsükchitep atener. Kodang tsükchitep tena lidir memeteti kati ka dak tako chiteter aser tanem-tanemi tembar anato tsükchir kümadoker. Tsükchir kümerbo temeten bushinüdang pei taküma sama mesasai tekong meranga nokdaker; kasa tiaji alima nung kin tsüngda ataloker. Linük ana tsüngda tsükchir kümerbo linük kati inyakbaji tangaba linük jagi anema apusor aser tatem nungbo tongbang raratsüsa tensa kümadoker. Alima nung rara tulu aika raraogo aser item rongnung kanga dang tatishitsü küma nüburtemi jembiba rongnung Vietnam rara yaa ka ta tetshir. Iba tongbang (Vietnam War) dang ya ‘Second Indochina War’ mesüra Vietnam nungeribo ‘Resistance War Against America’ taka ajar. Iba rara ya Vietnam, Laos, aser Cambodia linüktem nung 1955 küm November 01 nü nungi Saigon jirepba sülen 1975, April 30 tashi rara. Shidakbabo iba tongbang ya North Vietnam aser South Vietnam sorkar na tsüngda raraa tenzük saka North Vietnam army-ji Soviet Union, China aser tanga Communist linüktemi nungit aser South Vietnam nungerji United States, South Korea, Australia, Thailand aser tanga anti-communist kintemi nungit. Iba tongbang dang ya Cold War mapang atalokba ‘proxy war’ taka tetshir; iba rara nung Vietnam sepai aser civilian-tem asübaji tejangjabo ashitsü makoker saka nisung 966,000 nungi 3.1 million tsüngda taküm sama ta tongmelang agi asadangteta  lir. US sepaitembo 1973 küm August 15 nü iba tongbang nung shilem agiba nungi anenadok saka North Vietnam Army-i Saigon atsüngdokba sülen 1975 küm April ita nung iba tongbang tembang aser küm ka dang lir North aser South Vietnam naji ka küma longjem. Tongbang tembangaka Vietnam lima nung takoksa aser teraksa alubaji ulura liasü anungji Vietnam nunger talisa North Vietnam purtem United States dang jashibaji shisadangra tadoka magütsünütsüka jashiseta temulung kurema alitsü südi. Hau, Vietnam nunger million paika tespetbaji America nunger kijai dangbo inyakba masü saka parnoki tongti shilem agi asünungji parnok dang jashitsüji tim dang. Alima nung tadok agütsüba rongnung tasaktibaji tsükchir nem tadok agütsüba ya lir; hau tangatetba tajung melira aikati pei tsükchir nem tadok agütsütsüji atsüayonga bilemer aser tebang agi tadok agütsüyonga temulungjangi kodanga mamateter. Aji oda, akhidang tsükchitepa liaka, tangbo yimjung yanglur asünung linük ana tsüngda tesendaktep akangshitsü nükjidong yur United States-i tongbang nung amshiba tayimtsü abenba jahaz ka Vietnam lima semdangi aotsü renemba maparenjia kanga dang temenungratsüka asütsü. Vietnam tongbang tembanger küm 40 dak tema sülen tang US sepai teimtibai linük semdangtsü sentong renema lir aser iba jahazji March ita nungbo Vietnam atongtsü bilema renemtepdagi. Iba maparen yagi US-i par tashi sayur ama bilemtsüa akok saka America nunger nükjidongji linük ana tsüngda tsükchir aliba nungi tesendaktep tali akangshia bener aotsübaji lir. Atangji Vietnam nungeria parnok jashia aliyongbo US nungeri atsüanema inyaker asünung, iba maparen ajanga parnok tsüngda tesendaktep temaba jenjangi bener atutsü ta imladagi. Kasaji asenokia asen tsükchirtem den putepshia aotsü asoshi kechi inyaker? Asenokia asen tsükchirtem nem tadok agütsür asü masü? Aibelena ka ali asünunga shidak alirtem dang tadok agüjang ta shiteter asü masü? Yimjung yabo telok ka tsütsü kijai inyakba agi dangbo meyangluteter asünung, telok anaprongi atsüanem katepa putepshia aotsü atema ajungmesoteptsüla aser jembiba dang masü aseni jembibaji mapa agi inyaka sayudi.

You must be logged in to post a comment Login