Tsüklai 27 nü election agitsü atema renema lir: CEO

Kohima, Aenjeti (January) 19 (TYO): Tanü Hotel Japfu, Kohima nung osangbenertem senden ka nung state election department ketdangsertemi, Tsüklai (February) 27 nü State General Election kanga junga agitettsü atema Nagaland Election Department junga renema lir, ta metetdaktsü.
Osangbenertem senden nung Chief Electoral Officer (CEO) Nagaland, Abhijit Sinha-i, state nung tang tesütiba electoral roll nung voters 11,89,264 lir, iba nungjagi tebur 600536 aser tetsür 588728 lir, ta metetdaktsü.
Taruba election nung Photo Electoral Rolls (PER) amshitsü ta metetdakja pai, PER ajanga shilem 99.99% ayimjemtsü aser Electoral Photo Identity Card (EPIC) ajanga shilem 96.95% ayimjemtsü, ta metetdaktsü.
Paisa, election agiba mapang polling station nung voters ajak identification alitsü aser EPIC agüja aliba electors ji EPIC ajanga jangjatsü, ta ashi.
Iba dak sendakba nung pai residual electors ajak dang peipei assembly constituency nung electoral registration officers ket nungi EPIC meshitsü metetdaktsü.
CEO-isa, tensa azüoktsü, security aser ‘election code of conduct’ metembang tashi patrolling aser checking atema Central Armed Police Force (CAPF) company 273 den State nungi State Armed Police Force company 58 aser District Executive Force 5698 lemzükja amshitsü, ta metetdaktsü.
Sinha-isa, election timi junga agitettsü atema Static Surveillance Team 94 aser Flying Squad team 180 den check post 94 amenoktsü, ta metetdaktsü.
CEO-isa, Election Commission-i election observers, general, expenditure observers aser micro observers peria lemzüktsütsü, ta metetdaktsü.
State nung polling station ajak agi 2194 lir, aser iba nungjagi polling station 459 jila/yimtitem nung lir aser polling station 1735 yimtsüngtem nung lir, aser item nungjagi polling station 1048 lendong adoktsüsa tesem tamajungtem lir, polling station 519 lendong adoktsüsa aser polling station 617 normal lir, ta paisa metetdaktsü.
Polling station ajak nung Electronic Voting Machine den külemi Voter-verified paper audit trail (VVPAT) machines amshitsü, iba den külemi polling station ajak nung Assured Minimum Facilities alitsü, ta CEO-i metetdaktsü.
Election nung candidate kati sen timtiba agi lakh 20 dang indoktsü lateta lir, ta shia Sinha-i, state nung party aser candidate ajaki Nagaland Baptist Churches Council (NBCC)-i ayongzükba ama Clean Election inyakyim benshitsü imlar, ta ashi.
Election magidangyongi Naga yimtenren onük latettsü atema Naga tribal tentettem aser lokti tentettemi akhangba dak sendakba nung election nung timtem adoktsüa akok, aser iba dak sendakba nung CEO-i, India temzüng nung aliba ama Election agitsü sangdongogo, ta metetdaktsü.
Iba dak sendakba nung pai nüburtem dang election inyakyim nung timtem magütsütsü, saka election maparen ajak junga agitettsü atema mepishia metetdaktsü.
Paisa, polling station ajak nung tetsür aser tebur tarensen balala nung nokdaktsü, ajisüaka teintet rogotem aser kinü tanur ajunga alirtem nem maongka balaka agütstsü, ta metetdaktsü.
CEC-isa, register süa aliba service voters ajaki election nung shilem agitettsü atema Election Commission-i Electronically Transmitted Postal Ballot System (ETPBS) inyakyim benoka lir, aser ibaji Nagaland nunga amshitsü, ta shisem.