Tsümartem teka achi tenzüker

Tripura nung dang masü saka joko Nagaland nunga yakonung Chumukedima nung tsümartemi lisopurtem dak azükba tensa tiaji Naga nunger asoshi loktiliba anema arrsangoktsüba mapa ka asütsü. Yakonung Chumukedima nung atalokba mapaji taoksaktsüka, kechiyong ibai tsümartem parnok pezü pongokati Naga nunger kibong ka autorickshaw nung ooya lia anizüker azükba otsü lir. Atangji, tia junga anasa alirtemi nokdangba agi taküm kümzükba dang ashi, ashiko, taküma dena samatsür lila. Taoba küm pezü pongoka tsüngda Nagaland nung, talisa, miya nungertem nütsüng renlokba ya tesüngmangtsüka lir. Parnok ya Nagaland kinükkisang ajak nung lir aser joko parnok melira asenok taküma melitettsüla amato kümogo. Talisa, Dimapur nung item nütsüngtem arenba ya reprangdangra, joko liso purtem dang nungibo parnokang teimba kümdagi. Tan ita tetenzüklen Muslim nunger benjong amongba mapang, Dimapur nung  parnok külemi moapu nung sarasadem sentong agiba mapang parnokji zünger mezünga zükrepa adenshia yur külemba nguogo. Item jagi tanü Nagaland mesür, anungji parnokji asenok madak meteta aser memeteti kibur kümdagi. Atangji, tang tashibo Dimapur nungbo ILP mamshir, anungji India nunger sensobo ajak kecha tenokdangba melii arua litetter. Ajisüaka, asenok asoshi tekümdangtsü kaji India nunger senso tenüng amer Bangladesh nungia dena nübo aika aruagi Dimapur nung senso küma lidar asütsü. Asenoki itemji mittsüla. Atangji, parnok ya asen lima nung aruagi kazürbo masü saka ayangertem lir. Parnok kar asenok kiojen yangluba nung amshir, kar asenok lu inyaktsür aser kar pei dokan amener. Ano, parnok rongnungsa karbo taxi gari aser auto rickshaw anishir, anungji shinga mazüng aser parnok nübojiang asenok rakteper. Aji oda, yakonung atalokba lendong ajanga tsübuba agi yashi Hokolbar nü Chumukedima nung tsümartemi amenba dokan kata melapok aser tsümartemi anishiba auto kata mesenzü ta asüba nungi asadangtetba agi, Chumukedima nung lapoka aliba dokan teimbaka miya nunger aser autorickshaw tesadang ka miya nungertemi anishir ta asadangtetogo. Asenokbo asen lima nung mapa maka meshimetsüa senzür aser nisung amokmerena sen sarua jajar saka bendanglen nungi arur miya nunger ama tsümartemi dang asenok rongsenbo ajak am-a lir. Asenoki dokan mementeter, kechiyong anogo piyong dokan nung amentsübaji tasak. Ibaji dang masü saka asenoki dokan nung anogo shi yokzükba senji chia anidaker, anungji tanaben ayoktsü asoshi oset alia bener marutetter. Asenoki taxi aser auto manishinür, kechiyong anepdang yakta saktsüla aser anogo piyong tatsük temekong kecha mali passenger bushia mendaktsütsüla. Naga nunger asoshi ibaji mapa tasak, kechiyong itemji kilirtem mapa aser Naga nungertembo kibur ta bilemer. Iba jagi tsümartemi asen kidang, alu nung aser dokan nung asen dang sahib aser miimsahib ta ajar. Aji oda, sahib o miimsahib naji tatem nung kecha maka atemer aser ayangeremjiang takar kümer, tang amaji kibur dak teka sangshitsü marendaker. Atangji, tanü Nagaland nung lisopurtem dangbo bendanglen nungi arur ayangertem teimba kümdagi. Ajisüaka, tang tashibo asenoki parnokji tanemi tashiyim mamshii odaktsüteta lir, kechiyong parnok shinga teti asoshibo kiojen yanglua mali. Anungji, Nagaland nungi miya nungertem aridoktsü ta masü saka odaktsütsübaji tanemi ozüngi melaba ama inyaktsüsa administration dak tashi keta lir. Iba tangatetba nung tarutsü Naga lima bendanger ket nungi kümzüka alitsü atema tang yongi administration-i jungjunga repranga bendanger nem dokan memendaktsütsüla aser taxi gari aser autorickshaw manishidaktsütsüla. Atangji, taxi gari aser autorickshaw teimbaka Naga nunger tenüng nung alitsüa akok, anungji item Naga nungertem jagi tsümar meyui peisasa pei gariji anishitsüla aser  yamaji mesütetra license katitsütsüla. Atangji, tang tangbo asenoki kisüjensüba aser lenmang yangluba mapatem nung tsümartemji melena jungabo meinyaktettsüa akok, anungji tang nungi danga tenzüka dokan amenba aser gari anishiba mapa anaji asenoki dang inyaktetra, tarutsü Nagaland  tanü Naga lanurtem ket nung kümzüka lir ta shitettsü. Iba nükla aser tangatetba nung  Naga nunger lanurtemi asentzü alua mapa inyaktsüla. Tang asenoki ajuruba timtem lendong ya asenoki asen melen tsümartem nem asen mapa inyakdaktsüba ajanga ataloker ta asenoki angatetdi.