TSÜNGREM ASER TAMANGERTEM

K. Imliyanger Jamir,  Eralibill, Dimapur.

Tamanger kari ashir, tashitak anebtsüji mozü shiteter aser mozü agi dang anebtsür. Ano kari ashir, mezüng küm noklangzüng mapang nung dang tematiba tashi agi tashitak anebtsü. Kari ashir, tanebtsü tashiji khristantem nem dang agütsü. Tejen lai mapang nung Yihuda nungertem dang tashitak anebtsütsü nangzüka lir. Ano tashitak kecha agi metongdaktsütsü ta shia lir. Tashitak ya temenen ajanga adoker ta lai nung tejangja shia lir. Yisu khrista tanela temeshi ajanga meshiteta mezüja shimtetba tashi khuli kaji tanebtsü agütsütsü asoshi liasü. Yisui tashitak balala agi shiranger ajak anebtsüba asenoki lai nung angur. Aji oda pai nütsüngtem nema tanebtsü tashiji agütsü. Tanüa pai tamanger kar nem tanebtsü tashiji agüja lir. Yisui tamangertem dang shinübaji ya: “Tanebtsüji shirisa amanger parnok asoshi tamaitsü lir.” Tanela temeshi-i agütsüba sempettem rongnung tanebtsü aser sayatenya ya lir. Tenyartem mapang nung shiranger aika tanebtsü anguba asenoki tenyartem kaket nung angur. Ano Yisui tashitak balala agi shiranger anebtsüba asenoki lai nung angur. Arogo tetenzüklen tenyartem mapang nung küm aika dang tashitak anebtsüba asenoki lai ajanga angur.
Tanüa Tsüngremi shirangertem yamaji anebtsüdagi. Kecha rata-a teli tanü putu nunga Yisui shiranger anebtsüba onok khuli lir. Kechiyong Yisu khrista yashi, tanü aser teti tatem maka kasa dang lir. Tenyartem mapang nung pai tashitak koma anebtsü tanüa yamaji dang anebtsüdagi. Alima nung tamanger ajungai Yisui tashitak anebtsüba meteta lir. Yisui asen menen dokra, asen tashitak idangyongi anebadoker. Kechiyong tashitakji temenen ajanga adoker, aser satanji tetepseter, tashitak anebtsü mesera manebtsüji pei tamang dak keta lir. Yisui kü tashitak anebtsütsü ta amangba agi asen tashitak anebadoker. Tashitak karbo Yisui anebtsür ano tashitak karbo manebtsür ta kecha tebendang mali. Asen tamang agi asen tashitak aneber. Tamasa nai ne menentem toktsütsüla aser nangzüktsüla, aser pa dak amangtsüla. Idangji asen tashitak anebadoker. Tamanger kari ashir, ibala tashitak yabo Tsüngremer sayatenya agi dang-a-shi maneber. Temenen ajanga tashitak adok, “saka Yisui asen mekokmintem bener oadok aser asen tashitaktem anebtsü.” (Mt. 8:17)
Tamanger kari Tsüngremi tashitak ajak anebtsür ta amanger, saka karibo tashitak ajakbo manebtsür ta bilemer. Tetenzük nungi satanji tetepseter. Anungji satan nem asenok manidaktsütsüla. Satan nem asenok anidaktsüba agi shirang maneber.
Ano tamanger aikati Tsüngrem ain tashi agi masü, mozü shiteter aser mozü agi dang tashitak aneber ta amanger. Saka tanü putu nunga Tsüngrem ain tashi agi shiranger aika anebtsüogo ta onoki khuli agütsür. Kechiaser Tsüngrem tsüngdangbo kecha tamakoktsü mali nung; shiranger aika onoki sarasademtsü nung shiranger tamang agi Yisui parnok tashitak anebtsüba onok kuli lir. Ano tarutsü nunga shibai Yisu dak amanger pa mesüra la tashitak pai anebtsütsü ta kuli tejangja agütsür.