TSÜNGREM ASER TAMANGERTEM

~   K. Imliyanger Jamir, Eralibill, Dimapur

Tashitak ya temenen ajanga adoker.
Kechi chiyungtsüsa asenoki sarasadem mesüi achir aser ajemer item chiyungtsüji memeshitet. Item chiyungtsü achiba jagi tashitak adokdaktsür. Tsüngremi ashi mangaba agi tashitak adokdaktsür, aser ibala tashitakji maneber. “Ni manebtsüba tashitak nenok rongnung yoktsü” (Levi 26:25). Asen menen agi asenok shirangdaktsür. Tsüngrem den tesendaktep raksaba yong pai asenok merenshir. Asenoki pa dangi meyipa ora, asen pai ashiba angara, aser asen menen nangzükra aser toktsüra, pai asenok dang tai adoker. Pai asen dang tai tokra asen tashitak anebadoker. Pa menangzükba purtem dak tashitak agi tongdaktsür, aser timtemdaktsür, aser kangshiseta asür. Yisui asenok dang temenen tatok magütsü tashi asen tashitak maneber. Yisui paralyzed nisung dang ashi, “kü chir ne menen tokogo” (Mk 2:5) kechiaser Yisu dak temenen adoktsü tashi ain lir.
Temenen benshiba agi küm semerti tashi shirangba nisung ka Yisui amungnü anebtsü. Iba sülen Yisui pa tenlaki nung angu, aser pa dang ashi, “Ajiang na junga kümogo; tali tamajungba tia ne dak matongtsüsa joko nai temenen tebenshi.” (Yhu 5:14) Aseni mapa tamajung inyakba yong, aser tai menaba yong asenok timtem tongshi agi tongdaktsür. Saka shibai asen tai ajak adoker, asen tashitak ajak anebtsür, pa dang temenen nangzükra; asen tashitak anebadoker aser pa temeim taochi agi tasütsü kangla nungi pai asenok atsüteter.
Asenoki temenen mapa medoktsüba agi; asenok shi nung tesünep mangur, anungji asen tanela-a anisüngzük mangur. Asen menen khuret ajak benloker Yisu dangi ao nung dang pai asenok dang tai adoktsü, aser asen tanela anisüngzük angutsü. Tamanger ajaki Tsüngrem lir ta amanga sarasademer, aser pa külemer. Asenoki amanga sarasadem nung shiranger tanebtsü angur. Asenoki pai ashiba angara, pa külemra aser pa dang sarasademra, asenoki kechisa meshir pai magütsüi malir. Asenoki Tsüngrem mangu, saka Tsüngrem lir ta amangbaji chichiba tamang. Asenoki kotak mangu, saka kotak lir ta amangbaji chichiba tamang. “Kechiyong shibai Tsüngrem dangi arudir, pai Tsüngrem lir ta aser pa bushirtem nem tajangzük agütsüba lir ta amangtsüla.” (Ib 11:6)
Yisu tanebtsür.
Yisu asen kibuba, aser asen kümtetdakba. Pai asenok moatsür, pai asenok nem chiyungtsü aser tzü agütsür, aser pai asen tashitak ajak agiener. Pai asenok tashitak nungi kümzüka ayur, aser tashitak anebtsür. Kümzüka ayur, aser tashitak anebtsür. Shirangeri yisui tashitak anebtsür ta amangba agi, shiranger aika tanebtsü nguogo. Asenoki asen temenen nangzükra, kati ka asoshi tanebtsü meshia sarasademba jagi asenok tashitak Yisui anebtsür. Yisui pa alima nung alidang tashitak balala agi shiranger ajak anebtsü. Tamanger shia Tsüngrem sempet balala, na sempet ka lir, aji kibuba asoshi, iba sempet jagi Tsüngrem sentsüwangshidaktsütsüla.
Nai rongsen magütsütetsüa akok, saka nai sarasademba agi shiranger tanebtsü ngura, ne sempet agi Tsüngrem sentsüwangshidaktsür. “Saka ni kechi aka aji ni ne nem agütsüdi; Nazareth nunger Yisu tenüng nung jaja-ang.” (Tim 3:6)
Yisu yashi tanü aser teti tatem maka kasadang. (Ib 13:8) Asenoki pa dak chichia amangtsüla; külemtsüla aser tashi angatsüla. Yisui ashi, “Atangji züngpong ni nenok dang shidi, shibai kü dak amanger, kechi mapatem ni inyaker, pai aji inyaktsü aser item mapatem dang nungi tuluba pai inyaktsü…(Yhu 14:12)
Tsüngremi tashi mangartem merenshi, aser parnok dang mangar ta asenok ajaki züngshi, saka asenoki pa dang tashi mangar. Kechiyong asenoki pa dang tashi manga, shibai Tsüngrem dak amanger aser Tsüngremi ashiba angar, shibai pa külemer, pai mepishiba Tsüngremi angar. Pai ashi angaba temoatsütem itemi lir. Pai na meimtsü aser moatsütsü, aser soyapokyatsütsü”…..(Taz 7:3) Nai tashi angara “Kibubai na tashitak ajak nungi kümzüktsü” (Taz 7:5) “Tang Yisui yimti aser yimtsüng ajak sema, parnok sinagog nung sayua, kotak yimli osangtajungji sayutsüngia, aser tashiak aser shirangba tapu tapu anebyonga ao.” (Mt 9:35)
Yisu, Tsüngrem angadi sempet ta asenoki meteta lir, anungji pa dang tashi angadi, pa külemdi aser pa dang sarasademdi. Pai asenok nem takümtsü tzü agütsütsü; pai asenok shirang anebtsütsü, aser pai asen tanela anisüngzükdaktsütsü.

You must be logged in to post a comment Login