Tsüngrem aser Tamangertem

~ K. Imliyanger Jamir, Eralibill, Dimapur.

Temenen tanelatem aridokba.

Yisu Khrista tenüng nung nisung dak nungi temenen tanela aridokba ya tenyaba mapa nung tongtipang shilem ka lir. Iba tashiji Yisui pa nütsüngtem parnok terana den nütsüng neterana nem agütsü. Tanüa Yisu dak amangertemi temenen tanelatem Yisu tenüng nung aridoker. Temenen tanela aridokbaji tamang temaitsü lir. Asenoki Yisu dak amang nung; asenoki Yisu tenüng tenyartemi temenen tanelai kangshirtem anebtsüba asenoki lai nung angur. Kechiyong tanela sempet tapu tapu lir, saka tanela ka dang.

Temenen tanelaji tasüba tanela masü. Ibai tanela tamajung. Itemi mojing tenzükertem lir. Mojing aser pa tenzükertem ajak Tsüngremi yanglu, saka mojingji Tsüngrem anemer aküm. Temenen tanelaji zünger mezüngdangtet alima ajunga nung lir. Parnoki meimchir aser shiruru ajak azüoka ayur. Temenen tanelai Yisu Khristaji Tsüngrem chira ta meteta lir, parnoki Tsüngrem dak amanger aser atentener. (Yak 2:19) “Oh na Tsüngrem chir, mapang matongdang onok kangshitsü yagi aru no? (Mt 8:29) Asen tetsüteboui süng lung Tsüngrem külemdang tenlabaji temenen tanelatem dang tenlaba liasü. Kechiaser parnok limapur liasü. Tenyar Paulia Korint nunger dang yamai shia lir, masü, “limapurtem tenlatemji Tsüngrem dang masü, saka temenen tanelatem dang tenlar. (I Kor 10:20)

Temenen tanelaji tasüba tanela masüa ta asenoki lai ajanga angatetter, shirnok Khrista nung asü, parnok ajak kotak nung Khrista den alitsü, saka Khrista nung masürtembo molumii aotsü obendangba aru atar.

Temenen tanelaji tanela tamajung mesüra memerükba tanela. Temenen tanelaji sarasadem agi dang aridoker.

Tamangertemji temenen tanela küpok malir, kechiyong tamangertemji Tsüngrem meyong. Kechiaser parnok dak aliba tanela temeshi shiba parnoki tamang agi; Tsüngrem nungi agizük nung parnok temangji pa tenlaki akümer. (I Kor 6:19) Temenen tanelai sayuba nung anidaker tamangertem tamang nung tsüker. Tamanger kati pei sasa ulua bilemba, asüküma bilemba, mezümekümba, ara asenba, item ya temenen tanela ajanga lir. Ano limapurtem tenlatemji Tsüngrem dang masü, saka temenen tanelatem dang tenla nung item chiyungtsüji asenoki dang tenla nung item chiyungtsüji asenoki machitsüla. Anungji Khristan taküm kaji teti rara nung nokdaker ka mesüker. Item raraji raratsü atema asenok ajak raraba sobutsü nüngdaker. Iba raraji temenen den raraba. Mojing tashiji onsara tesashi. Asenok tsükchirji mojing, paji angutsü makok, saka karibo angur. Paji tanela ka dang, saka onsara tashitait. Pa onsara majung, kanga teküra aser paji tanela ajak madak tanishir, pa dak taochi mali, pai inyaknübaji raksatsütsü asoshi dang. Koda sür Khristan tajung kaji raksatsütsü, tanela tamajung jagi meranger. Pa onsara tekülak. “Tiyazü ainkartem, shiri nenok dangi san sobutsü sobur arur, saka telonglen tesashi tsünü lir, parnok asoshi kümdangang.” (Mt. 7:15) tenyar Pauli ashir, asenok shi aser azü na den rarar masü, saka temenen tanela den rarar. (Efesa 6:12) Anungji asenoki tanelaji Tsüngrem nungi asü, masü tendangtsüla. (I Yhu 4:1-3).

Asenok ajak temenen nung aben, temenen nung aso aser temenen nung tain aküm. Anungji asenok ajak temeneni meyipanger alir. Item temenentem den asenok anogo shia rarar. Saka temenen tanela koba nisung dak ia lir, ibaji aridoktsü asoshi sarasadem nüngdaker. Shi tejangraba ajakji tanela temeshi anema lir, koba temenen nung aso ta jungkai adoka sayur. Anungji tamanger ajak Tsüngremmer raraba sobutsü sobutsüla. Temenen tanela aridoktsüji lokti sarasadem agi dang akoktsü mesüra aridoktettsü ta tamanger karibo ashitsü akok, saka iba atemaji ni kuli tejangja ka agütsüner. Lokti sarasadem agi dang temenen tanelaji aridoker masü, kijai aridoker. “Temenen tanela aridoktsü asoshi asen tamang asen mulungsentsü, asen tashi ajak agi asen Tsüngrem dang sarasadem nung nisung dak nungi temenen tanela aridoker.” Anungji temenen tanelaji kija sarasadem agia aridoker ta ni kuli asür. Saka shibai temenen tanela aridoka sarasademer pa mesüra la tanela nung tashi meiti lira; temenen tanela jagi yirutsütsü akok. Anungji asen sempet aser tamang jenjang angateta dang ibala mapajibo inyaktsüla ta ni ajungshir. Ano temenen tanela aridoka sarasademerji tanela agi sünga alitsüla, aser sarasademji Tsüngrem küpok, Tsüngrem sempet aketertem asütsüla. Aji oda mesüra temenen tanelaji maridoktettsüa akok.

Yisui pa nütsüngtem nem temenen tanela aridoktsü tashi agütsü. Tanüa tamangertemi Yisu tenüng nung temenen tanela sarasadema aridoker. Anungji shibai Tsüngrem dak tamang yur tenyaba mapaji inyakdir temenen tanela jagi pa mesüra la yirutsütsü makok. Yisui asen temang taküm tanela asoshi teti aria bilemtsür, anungji pai asen temang nung tashitak, anebtsür aser asen tanela anisüngzükdaktsür.

Yisu tenüng onsara tajung; aser tetezü aika. Yisu tenüng tesüngmangtsü, chubatem madak chubatiba, aser kiburtem madak kibuba. Tsüngrem asen den lir (Immanuel) Messiah, Ainkar, Pa tematiba putir, pa meimchir kümzüksang, Pa ya yimjung chuba chir, pa taküm aliba Tsüngrem, Yisu dak alaka asenok kümzüktsü tangar tenüng shinga agüja mali. Yisu asen kümtetdakba aser tesüneptsür. Pa tenüng nung asen takokba, pa tenüng kodanga memelenshitsü aser pa teti kasa dang alitsü. “Aser tangar shinga daka tekümtet mali, kechiaser kechi agi nenok kümzüktsüla, anüng kübok meimchir rongnung tangar tenüng kecha agüja mali.” (T.M 4:12).