Tsüngrem dak tesünep lir

“Nü dak sota aliba temulung nai tesünep teperi nung ayur: kechiyong nai pa dak amanger.” – Isaia 26:3
Taküm lenmang nung aiben ani belemadoker, tanela nung tashi mali ama khenkhenbo kümadoker, Saka taküm tzüsem yipru aitaka, asenok Tsüngrem dak metalokba ajanga süngjem süngjema alitsüla. Tsüngrem O jagi ashir, asenoki Pa dak sota aliba ajanga temulung nung tesünep teperi yuteter.
Aonung mejanga alidang shisabulu mesüra taküm khuret agi amoa moteti kangshir asü? Asenoki khuretji bener malitsüla, saka Tsüngrem O nung shia aliba ama Pa nem agütsüdi. Asen tashimait temenen kar liasü, itemji lira Tsüngrem dang tatok mepishidi. Pai atoktsü, aser merüktetdaktsütsü.
Aseni shisa buluaka, Tsüngremibo mebulur. Asenok Tsüngrem den shitak lira, kecha tetsübutsü mali. Pai asenok asoshi ta jungtibaji inyaktsü. Anungji, arung, kar taküm khuret bena lir asü? Shisabulu kar lir ma? Kibuba dangi bendi, Pa nem yutsüdi, Pa dak sota amangdi. Pai nü temulung tesunep nung yutsütsü.
Sarasadem: Taochi agi sünga aliba Teyanglur Tsüngrem! Kü khuret ajak Nü dangi bener arur; ni Nü dak sota amanger. Nü tesünep agi ni süngjangma ta Yisu Tenüng nung mepishir. Amen.