Tsüngrem taochi

Alima nung nisung tuluba nungi tilaba tashi, takar aser sensaker ajak Tsüngrem taochi agidang alir. Tsüngrem taochi ajanga asenok ajak iba limai aru aser anogo shia Tsüngrem taochi agi aochizüka asenok lendong aser timtem nungi kümzüka alir. Tsüngrem taochi agi asenok taküm kümzükba aser mapa nung takok angubatem asenoki aiben mejangjatsüa akok, kechiyong asenok anema alidang aser temang nung tashi itta alidang inyaktetba mapatem ajak ya asenoki asenoksasa inyaktet amato bilemer. Asenoki aiben asenoki kenyongi makoktsü ta bilemba mapatem dang Tsüngremi inyaktettsü ta bilemer saka kechisa asenoki asenoksasa Tsüngrem sayatenya tashi tenük agi mengui inyaktetter, itemjibo Tsüngrem medeni asenoksasa asenoki inyaktet ama asenoki bilemer. Ajisüaka, kechisa asenoki inyaktetter, item mapa tilatiba kata asenoki Tsüngrem tashi aser taochi medeni inyaktettsü makok. Tsüngremi maochira asenok taküm aliyonga asenoksasabo jajaa moutettsü, o mejembitettsü, mechiyongtettsü, amui moutettsü aser teboka-süng junga moutettsü. Itemji anogo shia asenoki Tsüngrem tashi medeni inyaktetba ama bilema inyakba mapatem kar lir. Aji oda, Paul taküm nunga Tsüngrem taochi mamatsü atema Tsüngremi pa temang nung timtem ka agütsü ta 2 Korint 12:7 nung shia lir. Paul ya aso tajung, tasü aser tashi tait nisung ka liasü. Pa taküm nung Yisu Khrista agizüker Osang tajung sayutsüngia jajadanga aiben pai pa anemer lokti ajuru saka pai itemji kokteta osang tajung sayutsüngia jaja. Pai Yisu tenüng nung tasür dena shia arudaktsü. Pa ajanga Tsüngrem sayatenya mapa jenti inyak. Ajisüaka, pai item ajakji pa ajungba agi, pa uluba agi aser pa tasü aser tashi aitba agi inyaktetba ama bilem südi. Ashiko, kenkenbo pai sayatenya mapa inyakba aser junga sayutsüngitetba jagi pa asüküma bilema alitsü akok. Ibayongji, Tsüngremi pa temang nung timtem ka agütsü. Ajisüaka Paul-i iba timtem agütsüba nükjidongji mangatet. Ashiko, pa temang nung timtem alibaji mojingi agütsüba timtem ta bilema aiben mojinga arütsür alitsüa akok. Aji oda, Paul-i pa temang nung timtem alibaji alima atakatem nungi aruba timtemang ka amto bilema Tsüngrem dang taneptsü meshia sarasadem. Pai tangarbo jungtsü aser tasür a shia arudaktsü, saka pa mang nung timtem tilaka alibabo pasasa pai maneptsütet. Idangji dang  Paul-i Tsüngrem tashi aser taochi angatet. Temang nung kecha timtem malidangbo peisasa mapa ajak inyaktet amato asüküma bilema liasü saka kodang timtem agi atong, idangji dang Paulia Tsüngrem medeni taküm alitsü makokba tashi aser taochi angatet. Aji oda, asenoki aiben asenok junga ali tashi asenoksasa alir amato bilemer aser timtem arudang Tsüngremi asenok maochir amato bilemer. Ajisüaka, kodang Paul-i Tsüngrem dang pa mang nung timtem aliba anepjang ta asemben tashi mepishi, Tsüngremi ashi, temang nung tashidak liaka, “Kü taochi na asoshi teperi, kechiyong Kü tashijibo tashimait mapang nungang junga meteter.”Aji oda, Paul-i idangjidang Tsüngrem taochi tali angtet, anungji nemnemtsü melen  pai ashi, ”  Anungji, Khrista ain kü dak alitsü asoshi ni kanga pelashishia kü mekokmein nung uludi. Aji asünung, Khrista atema mekokmein nung, sensamasatsüba nung, talira timtema inyakba nung, rishikangshi aser lendongtem nung, ni temulung uludi. (2 Koring 12-9-10). Aji oda, asen taküm nunga asen tashi aitba, asen ajungba aser aseni kanga junga inyaktetba mapatem kar alitsüa akok. Ajisüaka, idangji asenok kanga kümdangtsüla, kechiyong itemji Tsüngrem taochi medeni kecha meinyaktet. Aiben asenok Tsüngrem nungi piladaktsübaji asen timtem agi masü saka asenok tashi itta alidang ataloker. Aji oda, asenok temang nung mekokmein kar alitsüa akok saka iba jagi Tsüngremi asen dak tali temulung lemtettsüsa lira, ibajiang temoatsüba. Asen timtem aser mekokmein mapang menemnemli, kechiyong iba jagi Tsüngrem tashi aser taochi tali tajungba meteter.