Tsüngrem tsübuba candidate tem shimdi

Alima nung lennir asütsü atema Tsüngremi mulungba ama mapa inyaktettsüpurtem ang shimtsüla ta asenok Khristantemi kanga junga angatettsü tim. Mathi 6:10 nung Yisu-i Pa nütsüngtem dang “Kotak nung koda lir, alima nung aji oda nü mulung süang” ta sarasademtsü tetuyuba agütsü. Yisu sülen anidaker shingaia metetsümonga Tsüngremi mulungba anemer, noktaker mesüra Tsüngremer alizüngtem metongdaktsütsü atema inyakertem nem vote magütsütsüla. Tsüngremi mulungba den putepa mapa inyaktsü nangzükertem mesüra taküm libalirortem nem ang asenoki vote agütsütsüla.
Asen lima nung tamangba nüjiso bener arutettsü ta asürtem nem ang vote agütsütsüla. 1 Timoti 2:1-2 nung Paul-i Timoti dang Khristantem tiptema aser meshia alitsü atema ketdangsübaren nung noktaka alirtem atema sarasademjang ta tayongzükba agütsüba asenoki angur. Anungji, sorkar ketdangsübaren ajanga Khristantem talenba kecha melii amangtettsü atema asenoki Tsüngrem tsübuba lennirtem shimtsübaji kanga tongtipang lir. Yimyatsüya aser tangatetba tajung alirtem nem vote agüjang. Taküm asüngteta alir, Khristan tajung ka ta jembitsüba jibo kanga tezüba aser election mapang vote agütsürtemi anganütsüsa candidate aikati o tajungtem jembiaka mejembimar. Ajisüaka, iba kuliji parnok yimyatsüya aser taküm libaliro ajanga asenok dang sayur aser asenoki ibaji jungjunga asadangba sülen ang parnoki jembiba o temji agizüktsü mesüra magizüktsü indang telemtetba agitsüla. Tsüngremi meimchir mulungjang ajak nung ozüng züluoka lir kechiyong meimchirtemi shitak aser tai bendangteter aser iba jagi Tsüngrem ozüngtem benshir ta Laishiba nung shia lir. Anungji Tsüngremi aginüba anema mapa inyakba lennirtemji Tsüngrem anema noktakertem ta parnoki inyakba mapa ajanga jungkai adoka sayur. Candidate kati jembiba kija nung temulung lemer asenoki pa/la magizüktsüla saka asenoki tamasa pa/la indang tangatetba aser pa/la dak aketba yimyatsüyatem jungjunga metettsü merangtsüla. Joko anogo ishika dang lirbo asenoki election nung vote agütsütsü, anungji asenok lennitsüpurtem shimdang, asenoki kanga dang sarasadema Tsüngremi aginüba ama alirtem aser Pa ozüng kübok anidakertem ang shimtsü merangdi ni ta ayongzüker.