Tsüngremi mamatettsüsa inyakba

Asenoki Tsüngrem dang meimba aser amangbaji Pa tsüngdangbo kanga tilaka asütsü amai bilema alitsü akok. Ajisüaka, asenoki Tsüngrem pelatsüsa mapa tilaka inyakba mesüra tenla tilaka agütsüba ajanga Tsüngrem kanga pelar aser ibaji Pai teti bilemtetter. Aji oda, asenoki Yisu dang meimba ajanga alima mesama tashi asen tenüng mamatsüsa Paibo inyaker. Yisu joko alima shi taküm tembangtsü anogo mapang anasa aruba mapang ka, kenü Pa Bethani nung zütsüra aketer Simoner kidang mena alidang, tetsür kati sen jenti alangba teronem menemba totzü bener arua Pa kolak nung mezütsü. Atangji, tetsürla jagibo Yisu anogo ananü lir külen aputsü aser Yihuda nungertemi Pa südaktsütsü aser ano anogo asemnü lir Pa shia arutsü ta memeteti liasü südi. Ajisüaka, idakji alirtem dang Yisui ashiba ama, Pa mang aremtsü anogo anasai arur asünungji jelia tebu Tsüngremi iba tetsürlaji Yisu mang renemtsütsü yokba liasü ta angatetter. Tetsürla jagi Yihuda nunger puti ungertem aser tezülurtemi bilemba shisatsü aser sentong kecha memetet. Lai ka dang meteta lir, ibaji Yisuji Kümtetdakba aser Tsüngrem chir. La tamangji kanga tongmelang saka takang. Aji oda, lai Yisu meim, anungji Pa nem sen aika alangba jenjang teronem menemba totsü bener arua tekolak nung mezütsü. Lai iba ama ya Yisu arishirtem jashidaktsütsü asoshi meinyak, mesüra la nüngtugu akümtsü asoshia meinyak mesüra Yisu nem la nüng sangdaktsütsü asoshia meinyak. Lai Yisu kolak nung teronem menemba totzü mezüba jagi lai Yisu meimer ta kuli asü. Iba mapang lai o mejembi, sayutsüngi masü, sayatenya mapa meinyak, lai tangari meinyaktetba mapa balaka meinyak, saka Yisuibo la mamatsüsa aser putusa putu alima mesama tashi la bilemtettsüsa la jak ajiok. Tanü asenok nisung tsütsü bilemdi asübo, Yisu nungi langka nüngdak aginüba agi totzü sen jenjang aika alangba la kolak nung bener oagi mezütsür südi ta bilemla. Ajisüaka, iba tetsürla mulungjang nung Yisu nungi aginüba dang nungibo Yisu nem agütsünüba tuluba liasü, ibayongji lai akokba tajungtiba agütsü aser ibaji kodanga mamatsüsa Yisui ajiok. Asenok asoshia koma amala mapa ka inyak nung dang mesüra tenla kwi aben nung dang Yisui kodanga mamatsüsa ajioktsü amai bilemer. Abrahami par jabaso ka dang aliba Tsüngrem nem tarongba tenla agütsütsü mekoru, menungnang mesüra par chir melen tanga tajung ka tenladi ta memepishi. Iba anogo Tsüngremi Abraham alima otsü nung kodanga maidoktsüsa moatsü. Iba ama tamang aser temulungjang Tsüngremi aginür. Tsüngremi asen mulungjang repranger aser asen mulungjang ajunga agi Pa meimba mapa agi sayudang Tsüngrem pelar aser alima mesama tashi asen senmang alitsüsa aser asen nüng mamai bilemtettsüsa  Pai inyaker. Aji oda, Mark tapu 14 nung tetsürlai Yisu meimba mapa agi inyaka sayu ama, anogo shia asenokia asen taküm yimya aser mapa agi Yisu meimba temaitsü tangar tsüngdang sayutsü nüngdaker.