Tsüngremi na atar

Ajangla nenok mejungia nenok chir nem sempet tajung agiasütsü nenoki metetra, kotak nung aliba nenok Tebui pa dang meimertem nem oset tajung koda tali magütsütsü?’ Mathi 7:11
Tenük agi angutsü akokba aser angutsü makokba ajak Tsüngremi yanglu anungji ajak madak tetenzük aser tatempang ji Pa lir. Alima nung tajung ajak tetenzükdakji Tsüngrem.
Iba Tsüngrem dak taküm metaloker aliba ochi temoatsü lenmangtem asoshi bilemtettsü nüngdaker. Mezüngbuba nung sempet ajakji Tsüngrem nungi lir. Ibai na akaba mesüra nai aaba agi masü saka ajakji Pa taochi sempet ajanga lir.Tsüngremi magütsüra asenok kecha makatsü.
Yacob nung ashir, “Sempet tajung ajak aser tabensaba ajak temaba nungi lir”. Iba yongjiang Kibubai sayuba sarasadem nung asenoki teti ashir. Anogo shia chiyungtsü tanü onok nem kua. Tsüngrem nungi sempet asenoki aatsü makok. Tsüngremji asen nüngdak magütsütetba Tsüngrem masü. Pai asen nüngdakba ajak peridaktsür, Taküm nung ne nüngdak nung na meperü lira aji Pa tai masü kechiaser lai o nung ashir ‘nenok kecha maka, kechiaser nenoki memeshir.’ Tsüngremi agütsütsü asoshi na atar. Nai meshiang.
Sarasadem : Kibuba, ni ne dangi arur aser meshir, tanü nüngdak yari moajang. Amen