Tsüngremi tenyaba

Tenyaba mapa inyaktsüba ya temulung lemtetba nungi adoker. Kodaser asenoki asen mapa ka inyakdaktsütsü atema temulung melemtetba nisung ka tenyatsü ? Tenyaba mapa tetezü kibur ka lir aser pai pa mapa inyakdaktsütsü asoshi kar nem khuret nungloktsür. Aji oda, tenyaba mapa yabo ni inyakdi ta asensasa meshizükba mapa ka masü saka kiburi asen dak temulung lemteta inyaktsü nungloktsüba mapa ka lir. Aji oda, Tsüngremer tenyaba mapa inyaktsü asoshi Tsüngremi temulung lemtetba temulungjang bushir. Tsüngrem dang asenoki “ni yangi lir, ni yokang” ta shiaka asenok mulungjangji Pa mapa inyaktsü asoshi renema melira, Pai meyoktsü. Asenok atema tekümdangtsüji ibaji lir. Atangji, Yisu Khristai  nütsüngtem dang, ” Nenoki alima ajakleni oang aser meimchir ajak dang osangtajung sayutsüing,” ta ashiba Mark 16: 15 nung angur. Ibaji Yisu Khristai asenok nem inyakdaktsünüba tenyaba mapa ka lir ta asenokia angateter. Ajisüaka, Yisu Khristai Pa nütsüngtem dak temulung lemtetba amato tanüa Pai asenok dak temulung lemtetsüsa asenok renema ali asü mali (?) ta asübaji asenok ajak atema kanga tongtibang asütsü. Atangji, asenok aikati Tsüngrem mapa inyakner aser Pa temeim indang kuli süa jajaner. Ajisüaka, asenok dak temulung lemteta Tsüngremi tenyaba ka mesüra asenok nübo aser rongsen laluba ajak amajok asütsü. Tetezü, Tsüngremer tekümtet osang tajung sangdongtsüba mapa ya Tsüngrem jembiba ka melii inyaktsü makok. Tenyaba mapa nung tetenyar tejangja ka alitsüla. Aji mesüra, kibur maliba lu inyaktsür amato asütsü. Tsüngremi Pa mapa inyaktsü tenyaba otsü tejangja ka asenoki Tenyar Mapa  8 nung shia angur. Iba mapang Yisu sülen anidakertem rongnung Filip-i Samaria nung Tsüngrem tashi tulu agi sayatenya mapa inyaka Yisu Khrista indang nübortem dang sayutsüngia liasü. Iba mapang pai temenen tanülatemi apuba nisungtem nungi ola tulu adoka temenen tanülatem aridoktsü, shirangertem aneptsü aser tsüngtsükertema jajadaktsü. Pai temenen ain aketba temezünger Simon dena temulung meyipdaktsü. Aji oda, Filip ya sayutsüngir tulu aser nüngtugu ka aküm. Ajisüaka, pai inyaktetba sayatenya mapa nung pai masüküm. Pai Tsüngremi mulungbaji kechi aser kechi inyaktsü atema tenyaner ta asübaji teti Tsüngrem dang asüngdanga liasü. Aji oda, Tsüngremi pa dak temulung lemteta tenyatsüsa pa mulungjang teti renema liasü. Iba ama Tsüngremer tajaba ataba mapang ka nung,  Tsüngremi pa dang aramesoa Yirusalem nungi Gazai aluba lenmangi oang ta tenya. Anungji, idangjisa pai apuso. Aji oda, Tsüngremi pa tenyabaji iba lenmang nung Ethiopia nunger teyangluba nisung ka temulung meyipdaktsütsü asoshi tenyaba mapa liasü ta tesülenang asenokibo angatetter. Aji oda, Yisu Khrista-ji Tsüngrem chir ta angtetnüaka mangateti aliba temenen pur ka pa ajanga iba lenmang nungjisa temulung meyipdaktsü. Tsüngremi tenyabaji yamaji tenyar aser yamaji ataloker. Tanüa, shitakba asenoki Tsüngremi tenyaba mapa inyaknüra Pai tenyatettsüsa asenok temulungjang renema alitsübaji kanga nüngdaker. Tsüngremibo asenok tenyaner saka asenoki ochishia Pai tenyaba mapaji inyaktsüsa asenok renema maliba agi Pai metenyatetter. Kari Tsüngremi tenyaba mejangjai Pa tenzüker, kari metenya ser nung tenzüker, ano karibo tenyaba mapa inyaker ser nung ochishia meinyaker. Item jagi alima nung Tsüngremi mulungba meinyakdaktsüi nokdanger. Iba jagi alima tesem aika nung asentenshi adoknüseta madoker. Ibayongji nübortem tanüla nung azülaa odaktsür. Tanü Tsüngremi Pa mapa inyakdaktsütsü asoshi asenok tenyaner. Aji oda, Tsüngremi temulunglema tenyatettsüsa asenok mulungjang renema alitsübaji kanga tenüngdaktsü. Chief ministeri nisung ka tenya nunga tashi tulu amshitetter süra, Tsüngremi tenyaba nisungibo tashi kodaka amshitettsü ta sarasadema bilemdangdi.