‘Two-child policy’ atema SC nung PIL ka benok

New Delhi, Tsüklai 12 (Agencies): India linük tesem ajaklen kibong shia tanur anana dang asotsü (two-child policy) atema Union sorkar nem tetuyuba agüjang ta Supreme Court nung Public Interest Litigation (PIL) ka benokogo.
Kasa PIL ajanga Supreme Court dang, family planning ajungkettsütsü atema linük tesem ajaklen two-child policy benokang aser nüburtem dang ibaji benshitsü ajungshiang, ta mepishia lir.
Temepishiba benoksang jagi ashiba agi, tang linük nung nütsüng kanga renlokba ajanga ali nungi adokba rongsentem amokmeren jenjang ka nung lir, iba denji külemi alima tzü-mopung-a menener.
China nungbo nütsüng kanga arenba azüoktsü atema 1979 küm sorkari ‘one-child policy’ benoka liasü.
Osang angazükba agi, 2016 küm sorkari iba policy agiena liasü, ajisüaka 2017 küm nung China nung tanur 630,000 agi tajemba aso.
India nunga family planning dak sendakba nung Andhra Pradesh, Gujarat, Maharashtra, Odisha aser Rajasthan state tem nungbo ‘two child norm’ lateta benshir.
Two-child norm ya India nung nütsüng azüokba family-size control mapatong tulutiba lir, aser ibaji ajanga kibongtem dang tanur ana dak tema masotsü ajungshia arur.
Item state nung Two-child norm mebenshirtembo Panchayat council nung shilem magütsür; public services aser sorkar welfare programs nungi tajangzük kar magutsür, aser item rongnnung tetsü o tanur na indang health programs densema lir.