Typhoon Damrey ajanga nisung 19 taküm agi

Typhoon Damrey ajanga nisung 19 taküm agi

November 4, 2017 nü Vietnam kübok Khanh Hoa province nung Typhoon Damrey ajanga ki ka chireptsüba noksa nung angur.

Hanoi, November 4 (Agencies): Honibarnü Vietnam nung Typhoon Damrey ajanga lendong balala atalokdang nisung 19 asü, ta sorkar osang ka ajanga metetdaktsü.
Vietnam nung Asia-Pacific indang APEC summit agitsü anogo ishika dang lia iba lendong atalokogo.
Damrey yipruji anepdang 4:00 ako meta tonga aru aser mopung indang tashiji 90 kmph (56 mph) liasü. Yipru ajanga kilem 1,000 dak tema ayipdok aser electricity poles aser süngdong aika laodaktsü.
Yipru nung nisung 12 samar bushiteper aser kiojen 370 dak tema chirepogo. Nisung 33,000 dak tema pei talidal nungi anienogo, ta search and rescue committee ajanga metetdaktsü.
South China Sea nunga rong trok meküpok aser rongtem nungji nisung 61 mena liasü. iba lendong nung nisung 25 kümzükogo, ta sorkar osang ka ajangasa metetdaktsü.
Yipruji Nha Trang yimti anasa ali mezüng atong aser iba tesem nung taruba hopta nungi Asia-Pacific Economic Cooperation (APEC) summit agitsü sentong lir.
Danang nungbo yipru süiba aser tzünglu aruba osang dak alaka nisung asüba mesüra yiruyibong asüba osangbo kecha mangazük lir.
November 10 nungi tenzüjba summit nung U.S. President Donald Trump aser China tir Xi Jinping, Russia tir Vladimir Putin aser tanüngba APEC züngsemtem nungi lennirtem adentsü.

You must be logged in to post a comment Login