UK minister Priti Patel anen, Penny Mordaunt shim

London, November 09 (Agencies): UK indang International Development Secretary, Priti Patel ya miima Israel ketdangsertem ajuru, ta osang temai adokba sülen menden nungi la-sasa aluogo aser la melen Penny Mordaunt shim.
Patel ya Uganda-i aotsü liasü saka iba sentong thir UK-i Bodhbarnü meyiba aru. La ya August ita Israel-i aodang Israel yimden yimsüsüretem den miima senden 12 ben amen aser item rongnung Israel Ato Kelonser Benjamin Netanyahu den khen mena lir, ta osang temai adokba sülen UK yimden nung iba temelenshi ya adoker.
Israel anogo 13 agia semdangba sülen Golan Heights nung lai Israel mitkartem nem British teyari sen agütsünü, ta Patel-i ashi.
Patel-i Israel Public Security Minister Gilad Erdan ya September 7 nü British Parliament nung ajuru aser foreign ministry ketdangser Yuval Rotem-a New York nung September 18 nü ajuru, ta osang temai adok.
Lai mapa toktsüba shidi züluba nung UK Ato Kelonser Theresa May mesüra Foreign Secretary Boris Johnson dang item mensem indang osang magütsüba asoshi tatok meshia zülu.
Arishi küm 44 tain UK nung Work & Pension Minister Mordaunt ya 10 Downing Street nung ato kelonser ajuruba mapang ka lir.
Patel ama Mordaunt ya Conservatives nungi lira ser EU Referendum mapang Brexit busemer ka lir.
Ibai hopta ka tsüngta UK nung cabinet züngsem anabuba mapa nungi anener alitsü. Taoba hopta UK Defence Secretary Sir Michael Fallon mapa nungi anen aser pa melena Gavin Williamson shim.