UN-i Egypt nung Coptic tenla kitem lapoktsü atema tetuyuba agütsür

Cairo, November 17 (Agencies): Tongtipang U.N. lawyer kati Egypt sorkar dang hopta ka tsüngda Coptic tenla kitem shibangtsüba anentsü aser shibangja alibatem lapoktsü atema tetuyuba agütsüogo.
U.N. high commissioner for Minority Affairs fellow, Joseph Malak-i Prime Minister Sherif Ismail den külemi Interior, Local Development, Parliamentarian Affairs ministry tem aser Alexandria governor dangi shiditem yok.
“Malak-i Egypt indang 2013 Constitution aser 2016 indang Law 80 nung ajemdaker tetuyubaji agütsü. Paisa 2017 ministerial decree no 199 nung tenla ki yanglutsü aser tenzüka aliba arogotem commission asütsü indang ozüngtem nung ajemdaker osang metetdaktsü” ta al-Masry al-Youm osangkaket ajanga ashi.
“Malak-i takhangba agütsübatem rongnung Minya, Sohag aser Alexandria dena Egypt ajungalen governor temi tenla kitem tanaben lapoktsütsü indang mapa inyaktsü shia lir” ta parnokisa metetdaktsü.
Taoba ita Minya nung ketdangsertemi tenla ki pezü shibangtsü. Coptic Orthodox Archbishop-i ashiba agi, pai mezüngbo ola madok saka iba jagi teyari kecha mangu.
“Tenla ki shibangtsüba atema onoki hopta ana tashi ola madok aser ketdangsertemi angatettsü ta imla. Ajisüaka, onoki ola madokba agi tensa tamajungba aküm. Copts nungeri sarasademba atema merenshi” ta Bishop Macarius-i ashi.
“Taoba hopta ana tsüngda atalokba amaji tesüiba kümtem matalok. Tenla kitem shibangtsür, Coptic Christian tem amaker aser parnok kiojentem raksatsür” ta paisa shisem.
Taoba mapang sorkari talila bilemoka aoba Islamic nunger dang nungi Khristantem kümzüka ayutsü ta nangzükogo saka tamangertemi ita aika parnok reshikangshia aruba osang metetdaktsür.
Orthodox Church atema attorney aser Coptic Christian activist, Naguib Gobrial-ia ashiba agi, taoba hopta Shubra district nung tenla ki ka shibangtsü aser tamangertem sarasadema mesüdaktsür.
“El-Minya governorate nung talila bilemloka oa amangertem aika lir aser ozüng amertemi parnok mazüokteter. Item nisungtem jagi tenla ki yangluba ozüng amokbanga lir” ta Gobrial-isa shisem.
el-Minya governor-i Al-Galaa yimtsüng nung tenla ki ka renew asütsü atema temelaba magütsü. Tali bilemloka oa amangertemi pa nem takhangba kar agütsüba sülen pai iba mapa meinyaker, ta Gobrial-isa aitsü.