UN nung BRICS linüktemi kiralongra anema raratsü bangjem

United Nations, September 22 (Agencies): BRICS linük temi kiralongraba maparen ajunga aitsü aser India aser tanüngba linük pezüi United Nations nung shilem tuluba agitsettsü asoshi temelenshi alitsüla, ta ashi.
New York nung UN General Assembly Session akatsü lia BRICS linüktem nungi foreign minister tem Brehostibarnü senden amen. BRICS nung züngsem linüktem ji Brazil, Russia, India, China aser South Africa lir.
UN nung Security Council densema temelenshi nüngdaker, ta item linük pongu nungi minister tem külemi sangdong.
Russia aser China ya UN Security Council nung permanent members lir aser iba linük anati sangdongba nung Brazil, India aser South Africa linüktemi international jenjang nung mapa tajung aika inyakteter aser UN nung shilem tuluba agütsütsüla, ta ashi.
India nungia iba senden nung External Affairs Minister Sushma Swaraj oa aden aser iba senden ya China nung BRICS senden mener hopta ishika tsüngta ajurutepba lir. China nung BRICS senden amenba mapang kiralongrar anema akhang akhanga nokdaktsü lemtet aser Pakistan nung amenoker aliba Lashkar-e-Taiba (Let) aser Jaish-e-Mohammad (JeM) teloki iba region nung azüdokshi adokdaktsür, ta tenüng tuteta aitsü.
Linük aisü nung rara adoka aliba süoki ia bilemtsü asoshi item lenir temi ashi.
Israel-Palestine nung mangatettep adoka aliba, Yemen, Syria, Afghanistan, Africa aser Korean Peninsula nung tebilemtsü adoka aliba ya tangatettep kati arutsü asoshi inyakteptsü ajungshir, ta BRICS züngsem temi sangdong.