UNC-i state sorkar dang tatembang tebilemba meshir

Senapati, November 11 (Agencies): February 23, 2018 nü senden amendang Manipur state sorkari district tasen tentetba onük atema tatembang telemtetba ka agir metetdaktsütsüla ta United Naga Council (UNC)-i ashi.
Yashi Centre, state sorkar aser UNC senden amendang district tasentem tentetba sülen nübortemi khuret ajurubatem reprangshimtsü atema bangdak ketdangsertem nem tetuyuba agütsütsü telemtetba agi.
Senden nung UNC lennirtemi state sorkar tenüng nung arurtem dang olemtep nung madentsü atema amokmeren. UNC lennirtemisa December 8, 2017 tashi nung state sorkari district tasentem tentetba meyipa agitsüla ta takhangba agütsü.
Taoba chief minister Ibobi Singh-i aniba sorkari December 8, 2016 nü Manipur nung district tasen 7 tentetba osang metetdakja liasü.
UNC lennirtemi iba takhangba agüja toktepba sülen state sorkar tenüng nung adenertemi UNC dang iba onük den sendaktepa alirtem ajak den asüngdangya asüba sülen telemtetba tajung ka agitsü atema mapang talila apulokjang ta ashi.
Iba senden nung Manipur sorkar tenüng nung adenertemji-i Hangkhanlian (Agriculture, Veterinary & Animal Husbandry Minister, N. Kayisii (Tribal and Hill Areas Development and Fisheries minister), Thokchom Radheshyam Singh (Education and Labour and Employment minister), J Suresh Babu (Additional Chief Secretary, government of Manipur) aser K. Radhakumar Singh (Commissioner (Works) government of Manipur) nungertem liasü.
United Naga Council tenüng nungi Gaidon Kamei UNC President, S. Milan UNC General secretary, James Inka All Naga Students’ Association Manipur (ANSAM) general secretary, Asha Wungnam Naga Women’s Union president, L Adani advisor, UNC, KS Paul Leo taoba UNC president, Samson Remei taoba UNC president, Weapon Zimik Tangkhul Naga Long (TNL) president, Poupoklung Kamei Zeliangrong Badi (M) , president, Robert Lamkang Chandel Naga Peoples Organisation (CNPO) president, Rockson Shimray (UNC), AC Thotso (ANSAM), SK Stephen (UNC), Gabriel Chinir (UNC) aser T Moses Kamba, Naga Peoples’ Organisation (NPO) president nungertem aden.
Taoba mapang ama senden nung mendenji Satyendra Garg, Joint Secretary, Ministry of Home Affairs, Government of India liasü.
Centre, state aser UNC tsüngda yashi senden amenbaji pungububa liasü. Mezüngbubaji March 19, iba sülen May 19, tasembubaji August 11 aser pezübubaji October 6 nü liasü.

You must be logged in to post a comment Login