UNESCO director inyaktsü atema France tsür Audrey Azoulay shim

Paris, October 14 (Agencies): UNESCO indang executive board-i taoba French Culture Minister Audrey Azoulay parnok tanishir asütsü shimogo.
Taoba hopta United States-i UNESCO toktsür ta osang sangoktsüba ajanga election maparen anokshi aser iba ajanga UNESCO dangi senotsü teyari anguba aser tarutsü teinyaktsütem atema khuret tulu ka bener arutsü.
Azoulay-i Bulgaria nungi Director-General Irina Bokova melenzüktsü. Irina-i küm 8 tashi inyaka arudang senotsü khurettem aser Palestine züngsem kümdaktsüba ken o tem ajanga ashishitep ken o tem adoka liasü.
UNESCO-i Israel anema nokdakba atema taoba Brihostibarnü US aser Israel nati züngsem agientsü sentong atonger ta osang metetdakja liasü.
“Iba ama tensa ka nung, asenoki UNESCO nung talila temulung agüja inyaktsüla ta nibo bilemer. Asenoki teyari bushitsüla aser akangshitsüla, melenshitsüla, saka toktsür maotsüla” ta Audrey-i takok anguba sülen jembidang ashi.
Laisa Executive Board züngsem linüktem dang la dak temulung lemteta shimtetba atema pelaba metetdaktsü.
Honibarnü election nung Audrey-i Qatari candidate Hamad bin Abdulaziz al- Kawari madak 30-28 vote agi takok angu.
Taruba ita UNESCO indang general assembly-i executive board ajanga shimba Director agizüktsü.
Audrey Azoulay ya Jewish tsür ka lir aser taoba hopta nungi election maparen tenzükdangbo la pusema aika maliasü, saka tanga candidate temi anenba ajanga la jenjang tajungba aküm.
Tanü lai takok angubaji Arab linüktem atema tamakok tulu ka anguba lir kechiyong parnoki mapang talangka nungi UN Educational, Scientific & Cultural Organization madak tanishir inyaknüa arur.
1945 küm tentetba sülen UNESCO nung taoba mapang European, Asian, African aser American director temi inyakogo saka Arab nunger kati danga meinyakdangi lir.
France nunger Rene Maheu-i 1961-74 tashi UNESCO nung director general inyakba sülen Azoulay-i tang tanabenbuba inyaktsü.
Azoulay tebu ya Morocco nunger ka lir aser paji Morocco chubatem atema adviser tongtipang ka liasü aser iba jagi lai Arab nunger den tesentaktep lir.