Ungma nung 37 buba OKM lokti senden meraketa tenzükogo

Mokokchung, 17 Jan (TYO): 37 buba Ongpangkong Mungdang (OKM) lokti senden Bodbar aonung yangi “Takoktsütem Alemdanga” omen dak rangloker yangi Ungma yimtiba nung meraketa tenzükogo. Iba lokti senden nung OKM kübok unit 17 nungi tejaoker meyi ka shi adenshia mungdar.
Tanü iba sentong nung mungdang lapoktsür aser tongti tayonger, IPR & Sericulture, Parliamentary Secretary, Imtikumzuk-i mungdang sanger dang pei tera mamadoki sobaliba shitak benshiba den libaliru junga alitsü asoshi ajungshia liasü.
Taoba mapang Ongpangkong nungerji Naga lima tanir süa aru, aji saka, tanübo yamaji masü, anungji, yimli bener tsükong ka ama linük asoshi taküm bendanga agüja inyaktsü asoshi tayongzükba ka agütsü. Taka tait, kaket shisatsü nung mongin aser tetoktepba nela alitsü asoshi paisa kaketshirtem dak lidaktsünüba o ka ashi.
Tanü asenok ya kanga kara aoba putu ka nung alir, anungji, iba ama putu ka nung tejen yimya nung dang lidi süra asenoki tangar memeneptsü, anungji, putu den apet jangyu medema aotsüji kanga tenüngdaktsü, ta paisa ashi.
Tanü alima ya teraksa agi süngogo, anungji, kaketshirtemi item teraksa anema ola adoktsüla, ta paisa ashi. Joko asen jakdang lenir shimtsü mapang tongogo, anungji, shirnok dak nübur tenzüktsü mangdang lir, item purji ochi shia shimtsü asoshi paisa tayongzukba ka agütsü.
Meküli kaketshir Telungjem aser Chuchuyimpang kaketshir Telungjem nati “Clean Election” aser “Domestic Market for Sustainable demand” onük nung ajemdaker power point presentation ajanga tagitsü aser teshidangtsü o aika bener arua lemsatep. Tongti o jembir Jungshi S Jamir ajanga “exceeding the possibilities: relooking the political scenario in Nagaland” onük nung ajemdaker jembia liasü.
Ungma Baptist Arogo pastor Rev. Dr. Noklen Lkri Tsüngrem o tatsüka jembiba den temaotsü meshia sarasadem. Ungma Village Council Chairman, Alemtoshi Imsong-i tayongzükba o tulu bener arua mungdanger ayongzüka liasü. Ongpangkong Mungdang tir C. Angang Jamir aser Ao Kaketshir Mungdang tir, Imkongwati nati tepela o tatsütsü jembi.
Suyim shisaluyimertemi mungdang kanga meraketa lapoktsü aser mungdang choir-i ken ajanga sentong tali lemsadakja liasü. January 18 nü mezüng sentong anepdang 9:30 nungi tenzüktsü aser iba sentong nung Secretary to CM and Secretary RD & SIRD, Kelei Zeliang (IAS) tongti tesemdanger asütsü jaoka lir. Iba mungdang ya Jan 19 tashi alitsü.