University tajungtiba 10 nem sen crore 10,000 agutsütsü: Modi

Patna (Bihar), October 14 (Agencies): Honibarnü Ato kilonser, Narendra Modi-i, alima nung university tajungtiba 500 rongnung India nunger universities madenba ya maaksü lir, ta ashiba den külemi pai, sorkari university tem nem tashi agutsütsü aser taruba küm pongu nungbo alima nung university tajungtiba rongnung adentsü atema sorkar aser nija university tajungtiba 10 nem sen crore 10,000 agutsütsü lemtetogo, ta metetdaktsü.
Tanü Bihar yimtiba, Patna nung Patna University küm 100 ajungba sentong nung jembidang Modi-i, Nalanda aser Takshashila ama India nunger Univeristy ajanga alima tesem ajaklen nungi kaketshirtem atsüer aruteta liasü, ta ashi.
Iba sentong nung JD(U) lenir aser Bihar Chief Minister, Nitish Kumar-a liasü.
Modi-i, “University tajungtiba 500 rongnung asenokbo maden. Asenoki iba maaksü indoktsü asü meindoktsü. Asenoki meranga inyakba ajanga temelenshi bener arutsüla,” ta ashi.
University tem sadoksadoka aintsü atema sorkar university aser nija university tajungtiba 10 nem sorkar talenba makai university nem tashi agütsütsü atema sorkari scheme ka benoka lir, ta Ato kilonseri metetdaktsü.
“Taruba küm pongu nung parnok nem sen crore 10,000 agütsütsü,” ta pai metetdaktsü.
“Item University ji tayongzükba kar nung ajemdaker shimtsüla, aser parnokia iba jenjangji sayutettsüla. Putiotsü, university-i inyaktetba aser parnok asalentongtem nung ajemdaker shimtsü. Shimba maparen nungji tasembuba telok ka adentsü,” ta pai ashi.
Patna University ya central university ka akumtsü atema akhangba dak sendakba nung Modi-i, alima nung university tajungtiba rongnung adentsü atema nenoki inyaktsüla. Patna University-i tesülen atsüngzüka malitsüla,” ta ashi.
Paisa, Patna University nungi IAS aser IPS officers aika adokogo, yamaji IIMs nungia global company tem nung inyaktsüsa Chief Executive Officers (CEOs) aika adokogo, ta ashi.
Modi-i, India nütsüng shilem 65 bo arishi küm 35 tekübok lir aser parnok ajanga nükjidongtem ataloktsü, ta ashi.
Paisa, 2022 küm linük nüjiso ngur küm 75 ajungba benjungmong nungbo Bihar ya terenlok aliba state ka südaktsüner, ta ashi.

You must be logged in to post a comment Login