UP nung nashi shi achi ta tai tonglokja nisung ka tepset

Dadri (UP), September 30 (Agencies): Arishi küm 50 tain tambur kati nashi shi achi ta tai tonglokja Hombar aonung Delhi tezülen lokti kati pa tepsetogo.
Uttar Pradesh, Dadri yimtsüng nung yimtaklir nisung 100 dak temai arishi küm 22 Mohammad Ikhlaq aser tebu na kidang nungi anizükba sülen lungro aser süng amshia kanga mejungi azük.
Iba tatalokba nung Ikhlaq-a kanga mejungi yirua lir.
Par jabaso tambusang, arishi küm 24 Mohammad Sartaj ji Indian Air Force nung engineer teinyakdak lir.
Ibaji matalokdang minute 30 jilia anasa aliba tekülem kidang sangdong ka ajanga, nashi ka tepsetogo aser anüng-aluji transformer anasa lir, ta metetdakja liasü.
Aonung 10:30 ako meta lokti tulu ka Ikhlaq’er kidang adenshia par kioset ajak raksatsü aser pa kinüngtsü den arishi küm 70 tetsü na dak-a azük.
“Parnoki kü kinüngbu tekolak ajasaa azük,” ta Ikhlaq kinüngtsü Ikraman-i ashi.
Tesülen police aruba mapang nunga parnoki tezükdak liasü. Iba mapang police-i asangur trok apu. Parnok ajakji yi agi meseper liasü.
Ikhlaq’er jalai ashiba agi, par fridge nung napong shi dang liasü, aser ibajia Eid benjung atema par kinüngertemi agütsüba liasü. Shiji forsenic tendangtsü atema yokogo.
Uttar Pradesh nung nashi tepsettsü ozüngi memelar.
Tang police-i olulu prokertem bushidagi aser Chief Minister Akhilesh Yadav-ia nisung tepsetertem nem tatok magütsütsü ta ashiba den külemi asür kibong nem senotsü teyari sen lakh 10 agütsütsü sangdongogo.