UP nung okadak kati Sanjay Dutt jaok

Lucknow, October 27 (Agencies): Uttar Pradesh kübok Barabanki district nung okadak ka ajanga actor Sanjay Dutt jaokogo. Pai 2009 Lok Sabha election nübuyimba sentong nung BSP tekolak Mayawati anem ‘jaadu ki jhappi’ ka agütsüner, ta ashiba atema jaok.
Additional Chief Judicial Magistrate Sanjay Yadav-i actor nem ya iba osang agütsü, aser pa dang November 16 nü okadaki arutsü asoshi tetuyuba agütsü. Okadak ajanga maneni Mumbai police commissioner dang iba osang ya actor nem agütsütsü asoshi tetuyuba agütsüogo.
Iba ken o ya 2009 April 19 nü atalokba ka lir. Iba mapang nung Dutt, Samajwadi Party candidate Tikait Nagar atema nübuyimba sentong nung shilem agia liasü. Iba sentong nung Election Commission tetuyuba ama pa o jembiba mangaoka liasü, kong Dutt-i Mayawati nem ‘jaadu ki jhappi’ ka agütsüner ta ashi. Iba oren ya Munnabhai MBBS film nungi kanga nungtugu oren ka lir.
Kasa mapang nung iba sentong nung Samajwadi Party national general secretary Amar Singh aser party Gorakhpur candidate Manoj Tiwari na densema liasü.
Video mangaoka aliba dak ajemdaker Indian Penal Code Section 509 aser Section 294 kübok Sanjay Dutt anema ken o ka benoka lir. Iba Section 509 yagi tetsür tem anema o jembiba, inyaksangshiba dak sendakba nung ken o asadanger aser Section 294 kübok lokti nung o mesera inyanksangshi tapet masüba jembiba aser inyaksangshiba tsütsü o bendang agütsür.