US Defence Secretary, Ashton Carter-i Netanyahu den ajuruteper

U.S. Defense Secretary, Ashton Carter (Abelen)-i Israel Ato Kilonser, Benjamin Netanyahu den Jerusalem yimti kübok Ato Kilonser office kilung nung tanü Mongolbar nü ajurutepba noksa nung angur. (Jerusalem, July 21)

Jerusalem, July 21 (Agencies): Iran den nuclear tezüngzüktep agiba ajanga Israel den adokba mangatettepbaren agientsü nükjidong nung US Defense Secretary, Ashton Carter-i Jerusalem semdanga Israel Ato Kilonser, Benjamin Netanyahu den tanü Mongolbar nü ajurutepogo.

US densema alima tashi abenba linüktemi Iran’er nuclear sentong anentsütsü nükjidong nung par linük den taoba hopta nuclear tezüngzüktep agi saka yamaji inyakba ajanga alima tashi abenba linük lenirtemi kanga aibelena inyakogo ta shia, Netanyahu-i nuclear tezüngzüktep agiba maparenji kanga sashia aija liasü.

Carter-i tanü tatembangsüa Israel semdangba Netanyahu den ghonda 2 shi agia senden amenba osang jangjaogo.

Carter-i yashi, Hombar nüa Israel Defence Minister, Moshe Yaalon den ajurutepa par linük den mitkar tesendaktep taoba mapang nungi tajungba kümdaktsütsü tebilemba aliba olen lemsatepa liasü.

Carter-i Israel anüdoklentip tsütsü Lebanon arrtsülena semdanga Lebanon nung tentetba Hezbollah teloki Israel nem lendong bener arutsüba den sentakba osangtema agiba osang jangjaogo.

Hezbollah aser Hamas telok na densema Israel densemba region nung tentetba telungpur aser kiralongrartem Iran-i nungita yarir ta shia, Iran den nuclear tezüngzüktep agiba sülen par linük anema benokba tenokdangba sentongtem agienba ajanga Iran-i telungpurtem taoba mapang nungi tesashiba yaritettsü ta temulung malemba olen ka Israel-i metetdakja lir.

“Ozü US-i Israel den maneni tesendaktep tajung yua Middle East ajunga nung tensa junga alitsüsüa maparen maneni inyaktsü renema lir,” ta Carter-i yashi metetdaktsü.

Iran-i par nuclear osettsüset yangludak bensaba melena alima tashi abenba linüktemia par linük anema benokba tenokdangba sentongtem agientsü asoshi tan July ita 14 nü tezüngzüktep agia lir.

Ajisüaka, “Iran den nuclear tezüngzüktep agiba kijai Iran-i Israel anema amshitsüsüa tongpang nung amshitsü nuclear osettsüset bendentsü maparen menokdangtettsü,” ta shia, Netanyahu-i alima linük lenirtem den temulung malemba olen ka lemsatepa lir.

Iron Dome missile defence system densema US-i kümshi Israel nem dollar sen billion 3 shi jenjang aketba mitkar teyari agütsüba osanga bushiteta lir.