US-i Pak nem kiralongrartem anema inyakdaktsüner

Washington, Feb 02 (Agencies) : United States-i Pakistan nem par lushi telung nung atsükoka aliba kiralongrartem anema inyakdaktsüner, ta America nunger ketdangser tazüng kati metetdaktsüogo.
Anogo ishika tejaklen Afghanistan sema jajar meyipa arusang, Deputy secretary of state John J Sullivan-i ashiba agi, ano ajaki agizüktettsüsa region nung teti atema yimjung yangluba maparen nunga US-i Pakistan nungertem nem shilem agidaktsüner.
“Atangji item indangji pai Afghan nunger lenirtem den shisalemsatepa jembiogo,” ta pa meyipa aruba sülen osangbenertem den jembidang Sullivan-i ashi.
Paisa ashiba agi, Afghanistan lima semdangbaji pa atema kanga dang tongtibang liasü; Afghanistan den külem ser inyakba maparen tali akangshidaktsütsü atema ibaji maongka tulu liasü.
Afghanistan lima semdangba mapang pai Afghan Tir Ashraf Ghani, chief executive Abdullah Abdullah, foreign minister Salahuddin Rabbani aser tanga sorkar lenirtem den ajurutepa ken o balala jembiogo.
Sullivan-isa ashiba agi, “Tawa linük nung tashiyim lendong atalokaka, Taliban telungpurtem den ken o jembitsü atema anepalua inyaktsü, ta senden ajak nung Afghanistan nunger lenirtemi nenshia shiogo.”
“Yamaji inyaktsü nangzükba atema parnok nem tenüngsang agütsür kechiaser yimjung aser putepshia aobaren tenzüktsü asoshi Afghan nungertemi anir inyaktsüla,” ta paisa metetdaktsüogo.