US, Israel, India tesendaktepji Muslim atema khuret : Raza

Islamabad, Aenjeti 18 (Agencies) : Tawa koba US, Israel aser India linüktem tsüngda tesendaktep tali akangshia bener aotsü merangdagi, ibaji alima ajungalen aliba Muslim nüburtem atema tebilemtsü tulu lir, ta Pakistan Senate nung Chairman, Raza Rabbani-i temulung malem bilemba olen ka metetdaktsüogo.
Senate secretariat ajanga sangdongba osang ka nung ashiba agi, Tehran yimtiba nung 13 buba Parliamentary Union of Islamic Countries (PUIC) senden akadang pai iba tekümdangtsü osangji metetdaktsü.
Alima nung temelenshi ka tenzükdagi aser ibaji US, Israeli aser India tesendaktep akangshibaji asütsü. Anungji iba atema renema alitsü asoshi Ummah (Muslim world) longjemtsü nüngdaker; tanübo ibaji Pakistan aser Iran nati ajangshir saka asüng mashi linük kati ajurutsü, ta Rabbani-i ashi.
Paisa ashiba agi, US nungeri Al Quds (Yirusalem) otsü aser jenjang melenshitsütsü merangbaji Pakistan nungeribo kanga sashia anema nokdaker; iba maparenjibo khenyongi international law & UN Security Council anema inyaktsü merangba maparen lir, ta tanü Yangtepnü Dawn online ajanga sangdongogo.
Kanga dang tepetzük tia nung aliba Middle East nung yimjung maparen raksatsütsü merangba telemtetba ta bilema Pakistan nungeribo kanga sashia aitsüogo, ta Rabbani-i metetdaktsü.