US nung Instagram dang Snapchat tajungba akümer

San Francisco, September 20 (Agencies) : Tamshirtem apitep nungbo Instagram agi otsü aika yangluteta arur, ajisüaka US nung Snapchat ket nungang tamshir tasen tsütsü shilem tuluba lir saka iba maongka ya kecha mapang talangka atemabo masütsü amai, ta Bodhbarnü osangbenertemi metetdaktsü.
US nung shihilembaba tsütsü asadangba company, Jumpshot-i, US nung Snapchat amshitsü tenüng züluoka alirtem noklang nung shilem 52 saka Instagram atemabo noklang nung shilem 48 dang lir, ta asadangtetogo.
“Item shilem reprangdangra US nung Snapchat nung tasen züluokbatem ya Instagram dang nung tashi taitba aoer,” ta Jumpshot osang ajanga ashi.
Alima rangben nung reprangdangra Snapchat atema tasen sign-up asürtemji noklang nung shilem 38.5 saka Instagram bo noklang nung shilem 61.5 lir ta August ita nguteta lir.
Instagram ya Facebook-i 2012 küm agiadok aser iba noksa lemsatepba sabang ya alima rangben nung ita shia maneni amshir nisung million 700 lir.
Snapchat-i second quarter nung anogo shia million 173-i amshir ta sangdonga liasü — aser ibaji tesüiba küm dang nungi noklang nung shilem 21 agi tali asütsü.