US Open final nung Nadal o Kevin na asayatsü

New York, September 9 (Agencies): Rafael Nadal-i US Open semi-finals nung Juan Martin del Potro 4-6, 6-0, 6-3, 6-2 agi koka Grand Slam title 16buba koktettsü asoshi maongka ngutetogo.
Pa final nung South Africa nunger asayar Kevin Anderson den Deobarnü asayatsü.
“Season ka ana yiruba ajanga junga masayateti arur iba season ya kü asoshi kanga jangratemtsüka lir aser ano title ka atema asayatsü asoshi maongka anguba atema kanga pelar,” ta Nadal-i ashi.
South Africa nunger asayar Kevin Anderson-i semifinal asaya nung Spain nunger asayar Pablo Carreno Busta 4-6, 7-5, 6-3, 6-4 agi koka Grand Slam final mezüngbuba nung shilem agitsü asoshi maongka ngutetogo. Asaya akokba sülen Anderson-i pa kinungtsü, teti aser coach Neville Godwin den pelateptsü asoshi player’s box-i soketa atu. Iba asaya ya ghonda asemshi asayaa liasü.
Alima nung jenjang 32 nung alisang arishi küm 31 tain asayar ya Grand Slam final nung shilem agirtem rongnungi rank tajemtiba nung alisang kümogo.
Kasa mapang nung kasa asayamung tetsür tarep asaya nung Fourth seeded Indo-Chinese tarep asayar Sania Mirza aser Shuai Peng na Swiss tsür Martina Hingis aser Chinese Taipei tsür Yung-Jan Chan nati semi-final nung tsükdaktsüogo.
Hingis o Chan nati 6-4, 6-4 agi Sania aser peng na straight set nung kokogo.