US tsürtemi football world cup akokba atema nüngtugu nisungtem pelateper

July 06, 2015 : Deobar nikongtsütsü Canada nung US tsürtemi tetsür football world cup akokba sülen nüngtugu nisüngtem den Chad Michael Murray aser Matthew Morrison na dena social media sünga osang tajung lemsatepa liasü.

US tetsür team-i world cup tesüsabuba asaya nung Japan 5-2 agi koka iba marok benogo. Parnok ya alima nung mezüng world cup punguben abener kümogo. Film o TV nung shilem agirtemi asayartem ajurua tetushi agüja liasü iba mapang Abby Wambach aser Christie Rampone nati B.C. Place, Vancouver nung iba takok marok ajungketa liasü.

Goal asem yokla nem Murry-i messang balaka yoka liasü aser Morrison-i, “World Cup akoker nem tetushi tulu agütsür,” ta twitter ajanga lemsatepa liasü.

Ano Nick Jonas, Jared Padalecki, Snoop Dogg, Justin Timberlake, Josh Duhamel, Brandon Routh aser Josh Groban nungeria, “World Cup akokertemi shitak inyakogo,” ta twitter ajangasa lemsatepogo.

Jeffrey Tambor-ia iba takok benjung nung kanga pelaba metetdaktsü.

Teburi dang masü saka Sophia Bush aser Courteney Cox nungeria message balaka lemsatepa liasü.

Bush-i, “Tetsürtem nenoki tesüngmangtsü ka asaytetogo, ni kanga ulua bilemer,” ta twitter ajanga ashi aser Cox-i, “Tepela tulu lemsateper, #USWNT!!!!! Kangasa pelar,” ta twitter ajanga lemsatep.