VDBs-i kanga teladak süa inyaktsüla: Vikheho

Pughoboto, November 18 (TYO): Tanü Pughoboto nung Naga People’s Front (NPF) MLA, Y Vikheho Swu-i tawa Rural Development Block Ghathashi kübok yangluba Village Development Board Association Pughoboto Conference Hall cum Office Building semzükja liasü.
Iba sentong nung tongti tesemdanger o jembidang Swu-i Association-i takok ngua office balala amenoktettsüsa building yangluba aser conference hall densema yangluba atema tenüngsang agütsü.
Sorkar indang scheme balala takok ngua inyaktsü aser yimtsüngtem nung terenlok mapa inyaktsüji Village Development Board teinyaktsü khuret lir, ta shia local MLA, Swu-i, sorkar nungi agizükba senji VDBs-i ochishia kanga teladak süa amshitsüla, aser item senji yimdaklirtem lenla ajak nung ajungkettsütsü atema amshitsüla, ta metetdaktsü.
Iba tesem nung alirtem dang Centre aser state sorkar indang scheme balala nungi tajangzük agitsü ayongzüka pai, “VDB tashi itta lira yimtsüng nung lenla ajaklen terenlok alitsü aser yimtsüng rongsenkettsüng jenjang ajungkettsütsü,” ta ashi.
Pai Pughoboto sub-division nung VDB tem danga, iba tesem nung rongsenkettsüng aser loktiliba nung terenlok alitsü atema parnok tsüngda amalitepa inyaktsü ayongzük.
Sentong nungsa onük tatsüka jembidang ADC Pughoboto, Avelu Ruho-ia yimtsüng nung lenirtem dang peipei tesem nung lenla ajak nung ternelok alitsü atema VDB fund ji kanga shia kaa amshitsü ayongzük.
Laisa Bank ketdangsertem leniba kübok sub-division nung SBI branch ka lapoktsü atema benoka lir, aser ibaji kobi melii agizüktsü imlar; ibaji agizükra Pughoboto sub-division nung nüburtemi banking tsütsü timtem ajangshiba koktettsü, ta ashi.
Kasa sentong nungsa BDO Ghathashi Obed Achumi, Aphuyemi Sumi Hoho Tir, Inavi Swu aser SAKK Tir, Khkuto V. Achumi nungeria jembia liasü.
Iba sentong ta VDBA Pughoboto tatong Tir, Vihokhu Swu leniba nung agi, aser Mishilimi Baptist Church Pastor, Tovishe Shohe-i sarasadema liasü.
Sentong nungsa Atto Achumi-i ken ajanga shilem agi, VDBA Pughoboto tatong Tir, Boska Swu-i tepela anküp o jembi aser NCRC Pughoboto Pastor, Kanito Sheqi-i sarasadema sentong tembanga liasü.