Vote yoka achiba anenang

Clean election indang sentongtem nungbo kanga meranga adener, clean election indangbo kanga tasü itta jembir, sorkari terenlok mapa meinyakba atemabo ola tashi adoka aija jembir saka election nungbo candidate tem dang kanga dang odiodia sen meshia senzür ta asüba nisung aika tanü asen Naga lima nung lir. Iba tangatetba ajanga asen lima nungi election dak sendakba ochimashi agientsü atema inyakba mapa nung tetsükdaktsü ajurur aser item nisungtem yagi asen lima menentsür. Naga lima jungdaktsüdi, Naga lima renlokdaktsüdi, Naga lima tejakleni odaktsüdi, Naga lima ya Khristantem aliba lima ka mesüka kümdaktsüdi ta temulung nung ronga bilema asen lennirtemi kanga dang meranga election ochishia aser merüka agitsü atema jembitena arur, saka parnoki ayongzükba aser sangoktsüba ajak tu amajok ang kümdaktsür ama ajiteter aser iba atema temulung züreper. Tsaa.. Naga nungeria iba tashi ya ang angatet noh!!! Aya… Khristan tamangertemi iba tashi ang inyaker noh!! ta kanga nemjema bilemer. Osang kar angazükba agi 2013 Assembly election nung sen meshiba dang nungi tang kanga agi teimba meshir aser ibaji kanga dang taoksatsü osang ka lir. Aluyimer asüba agi election temer mapa mesüra contract mapatem memeshitettsü anungji election nung sen ang meshia agidi ta yimtsüng nung alir kari tatemtsü amer pei vote yoka achiba, kin mesüra kimang ka nungi kinungertemi tesem kar nung vote telong junga ayokba aser Clean Election maparen den infrastructure development ajanga parnok tepok memesütettsü ta onüktem amer nisung kari candidate tem dang nungi sen meshia agiba aser vote yoka achiba osangtem angashidang temulung rongsar. Naga nunger iba tangatetba ya toktsütsü mapang tongja tongogo, asenok mulungsentsü melenshitsüla kechiyong aseni amangba Tsüngremi asenoki temenen mapa inyakbatem angudang kanga jashiya alitsü aser Pa ain adokra asenoki metizüktsü. Naga lima yanglutsü atema tajung ka inyakdi ta asüdang aser talisa Khristan tamangertemi ochishia alitsü merangdi ta ayongzükdang yabo asenokia tashi angaa anidaktsüla. Iba ya tanü, tang tendak atema dang masü saka tarutsü atema aser talisa tanü lanurtem aser asen chirnurtem alima tajung ka nung lidaktsütsü, tangar den tsüngkang medema lidaktsütsü nükjidong yur tanü asenoki temelenshi ka bener arudi ta asürba lir. Anungji, vote yoka achirtem, nenoki nisung dangbo maaker alitsü südi saka Tsüngrem dangbo aakangma, nenoki külem meimchirtembo akhüm metsübur asütsü akok, saka ashirdang ashi Tsüngrembo atenatena akhümtsübuangma. Tanü na election nung sen tera anguba, rongsen tera bendenba, gari ka anguba, kimung ka ajangzükba jagi moumatsüsa na tia makara timtem toushi ajurutsü ana nung lirko. Aseni amangba Tsüngrem dak taochi molamoshia lir, Pai aremzükjen aremzüker aser Pai asenok dak metokmeperi alibatem agizüker, saka asenoki tekong merangjen meranga Pai maginüba mapatem inyakra,  künü Pa taochi mapang süitemtsü aser iba anogoji asenok asoshi ayatai anogo ka asütsü.