Vyapam sülen ano admission nung ochimashi ken o ka adokogo

Bhopal, July 10 (Agencies): Vyapam ochimashi ken o aser iba ken o dak sentakba nung nisung 40 dak tema asüba ken otem bushisüngdangtsü asoshi Supreme Court-i Central Bureau of Investigation (CBI) dang tuyuba sülen anogo ka lir ano admission ochimashi ken o ka nung Madhya Pradesh High Court obendangertem aser sorkar tongti ketdangsertem densema aliba osang ka jungkai adokogo.

Osang ka ajanga ashiba agi, Madhya Pradesh Professional Examination Board (MPPEB) koba dang Vyapan ochimashi ken o ta ajar, iba ken o nung densema alir High Court nungi obendangertem tenüng tarensen ka shidi ka nung sepbanger Chief Justice of India ket tongtsüogo.

Ochimashiba jungkai adoktsürtemi Supreme Court dang ashiba agi, kaket rejutem, medical aser dental college tem nung azüngtsü asoshi seat alizükertem rongnung obendangertem, IAS ketdangsertem aser IPS ketdangsertem kinüngertem densema lir.

Ochimashi jungkai adoktsür Anand Rai-i osangtsüsang channel ka dang, pa den nisung kari nija college tem nung admission ochimashi ken o nung densema aliba obendangertem tenüng kar envelope ka nung sepbanger Chief Justice HL Duttu nem agütsüogo, ta ashi.

Item kuli kakettem nung ajemdaker jungkai adoktsürtemi Supreme Court dang obendangertem kinüngertem tajangzük ngur asünungji Madhya Pradesh nung judiaciary-i admission ochimashi ken o angadangtsü asoshiji mashishitsüla ta shiogo.

Parnokisa Supreme court dang, Vyapam ochimashi ken o nung tongti aibelenertem jungkai adoktsür asünungji parnok amokmerener jenti alitsü ta shiogo.

Sorkar mapa angutsü mesüra college admission asoshi nisung meyirjang aikati supokrem agütsüogo aser iba ken o nung nisung 40 dak tema süogo.

Vyapam ken o ya 2012 küm temai adokba sülen nisung 2,000 jungnüa puogo aser parnok rongnung taoba state minister ka, tongti ketdangser aika aser kaketshir noklang aika densema lir.

You must be logged in to post a comment Login