WB nung tzümetsüng ajanga nisung 97 süogo

Kolkata, August 06 (Agencies): West Bengal nung tzümetsüng ajanga Brihostibar nüa nisung 12 süogo aser tzümetsüng ajanga state nung asürtem 97 ajungba anogo nung iba alima mopung lendong nung ajemdaker opposition party temi Chief Minister Mamata Banerjee aitsü tenzükogo.
Tzü ajema akümba ajanga tzümetsüng tensa tajungba kümdagi, saka tanüa state tesem balala nung nisung 12 asüba osang disaster management department ajanga metetdaktsüogo.
State nung district 12 kübok yimtsüng 16,300 nung aliba nübur lakh 63 shi tzümetsüng agi kongshiogo. Tzümetsüng ajanga ki lakh ka dak tema khenyongi raksaogo aser ki lakh 1.12 tera raksaogo, iba den ali hectare 8,20,435 nung tsünüba aonsotsü raksatsüogo.
Alima tzü mopung ajanga bener arutsüba lendong nung ajemdaker yimtenren tajangzük asoshi maongka agir, ta Left Front-i Banerjee aser lar party Trinamool Congress aitsür, ano külen lai Honibar nü party ajak senden ayongzükba atema BJP-i aitsür.
Left Front Mendenbuba Biman Bose-i, “Sorkari süoki ia magir aser timtemba nüburtem lungjemer yaritsü nüngdaka aliba mapang nung Chief minister-i, sorkari dang kümzükba aser teyari agütsüba maparen inyaktsü sangdongogo,” ta aitsü.
“Teyari osettsüset/chiyungtsütem Trinamool office tem nungi yokba dang masü saka item oset abenba truck tem nungji Trinamool wako asonger. Teyari osettemji party senpong nungi aliba masü saka nüburtem saru ajanga alibatem lir. Iba inyakyim ya tesempatsüka lir,” ta paisa ashi.
Ano külen State BJP Tir Rahul Sinha-ia shidi ka ajanga Banerjee dang, party ajak senden ayongbaji amajok nung ayongba lir, ta shiogo.
“Party ajak senden masü saka minister ka lenisüba nung yimtenren party ajak nungi züngsemtem tzümetsüng agi kongshia aliba tesemtem jagi yoktsüla. Ano teyari osettem junga lemtsütsü asoshi party ajak nungi committee ka tentettsüla,” ta paisa ashi.