Winter Olympic 2018 tenzükogo; S&N Korea longjemer shilem agitsü

Pyeongchang, Tsüklai 09 (Agencies): Pyeongchang nung 2018 Winter Olympics tenzükba sentong nung asayamung ayonger, South Korea-i kidanger North Korea den longjemba sayuogo.
Korean peninsula nung ita aika tebilemtsü adoka aruba sülen iba asayamung parade mapang linük ana nungi asayartem ya wako ka dang amer jaja.
“Asenok sadangtsünüba tashi dang asenok tashi taitba,” ta Olympic tir Thomas Bach-i sangdong.
Iba sentong nung Lizzy Yarnold-i Great Britain indang wako aben aser Russia nungi asayartem neutral Olympic wako kübok aru.
2016 McLaren report nung Russia nungi asayar 1,000 dak tali sorkar-i ketdangsüa ozüng alema mozü amshi, ta shia aliba ajanga Russia nunger ya iba asayamung aser taruba Paralympics nung shilem magitsü tenokdangba agüja lir.
Russia nunger asayar 169 ya anti-doping temzüng kübok aliba ama tarak maket, ta bushitetba sülen International Olympic Committee ajanga ‘Olympic Athletes from Russia’ tenüng nung shilem agitsü jaok.
North Korea nunger ice hockey asayar Chung Gum Hwang aser South Korea nunger bobsledder, Won Yun-jong nati Korea nunger wako aben.
Iba asayamung lapokba sentong ya ghonda ana agi aser iba mapang temperature ya -6 degree Celsius asüba ajanga Olympic Stadium nung terepranger 35,000 shi nem seat warmer, wind shield, korang aser glove tem agütsü.
Iba sentong nung tongtibang nisungtem amenba tesem nung North Korea lenir, Kim Jong-un tenu Kim Yo-jong ya USA vice-president Mike Pence tesülen amen.
South Korea Tir, Moon Jae-in-i la den teka amtepa salem asü aser sentong nung pai, “Iba maongka amshia ni Korea nüburtem dang salem den medemer indang osang sangoktsünür,” ta ashi.
“Seoul 1988 Summer Games ajanga anüdoklen aser anülulen alirtem longjemshitsü asoshi lenmang lapok – Cold War indang jara raksa. Summer Games ayonger küm semer lir Pyeongchang Olympics ya alima nung alir ajunga atema yimjung bener arutsü teimla nung tenzüker,” ta pai ashi.
“Alima nung sadanger aliba linük, Korea nüburtemi Winter Games ayongtsü kanga tejangraba liasü. Iba ajanga Olympic tanüla sayua yimjung asoshi nokdakba sayur,” ta Moon Jae-in-isa shisem.
North Korea-i Pyeongchang nung shilem agitsü atema asayartem yoktsü, ta Aenjeti nung sangdong, aser iba telemtetba ya küm ana sülen linük ana tsüngta ketdangsertem ajurutepa jembishinüba sülen agi.
North Korea nungi arurtem rongnung asayar 22 lir aser parnok ya saisapong pongu nung shilem agitsü aser tetsürtem ice hockey asayartem ya wako ka kübok unified Korean team tenüng nung shilem agitsü.
Iba asayamung sentong nung drones 1,218 amshia Olympic Rings yanglu aser iba ya Guinness World Record nung sentong ka nung drones timtiba amshiba otsü yanglu.

You must be logged in to post a comment Login