Yanis-i Greece Finance Minister menden toktsür

Athens, July 06 (Agencies): Greece Finance Minister, Yanis Varoufakis-i pai abenba yimsüsütsü menden toktsütsü shiti tanü Hombar nü benokogo.

Greece nem sen maneni apuja par senotsü jenjang tajungba kümdaktsütsü melena Greece sorkari sensotsü tajemba aser tali kümdangshia amshitsü asoshi Greece nem sen apuja aliba linüktemi benokba onük magizüker ta Greece nüburtemi yashi vote agüja par tebilemba metetdaktsüba sülen Yanis-i tanü Finance Minister menden toktsütsü shitiji benoka liasü.

Ajisüaka, Yanis-i yimsüsütsü menden nungi anentsü lemtetba ajanga ajakna aoksatsüogo kechiyong par nüburtemi senotsü tajemba amshitsü onükji agizük nung dang pai yimsüsütsü mendenji toktsütsü ta Yanis-i toaba mapang metetdakja lir.

“Eurozone züngsemtem kari ni Finance Minister-tem senden nung shilem magidaktsütsü osang angazükba sülen ni yimsüsütsü menden ya toktsütsü lemtet,” ta Yanis-i metetdaktsüogo.

Pai Finance Minister menden toktsüba ajanga par Greece aser par linük nem sen apuja aliba linüktem na tsüngda maparen sadema inyaktettsü tangatetba nung pai iba telemtetbaji agi ta Yanis-i ashi.

Yanis-i par linük nem sen apuja alir linük ketdangsertem den taoba ita ishika tejaklen nungi tenzüka mapang shia mangatetep adokba osang bushiteta lir.