Yemen arrtsülen helicopter ka tsükok, Saudi ketdangser densema asü

Riyadh, November 06 (Agencies): Saudi Arabia aser Yemen arrtsü nung helicopter ka tsükok aser iba lendong nung Saudi Arabia yimden lenir (prince) ka aser ketdangser tenet taküm sama, ta sorkar osang ajanga ashi.
Asir province nung deputy governor Prince Mansour bin Muqrin ya inspection tour aoba meyiba arudang pa amenba tayimtsü ya Abha anasa Deobarnü menur tsükok, ta interior ministry ajanga ashi, saka kechi tai ajanga iba lendong adalokar osang tejangja shia mali.
Saka iba lendong ya Saudi chuba yimli indang yimden yimsüsüba aser shishilempaba nung nung lenirtem temelenshi arur ghonda eshika dang lir adalok.
Arishi küm 32 tain, Crown Prince Mohammed bin Salman tekolak sür tenzükba anti-corruption telok ajanga prince 11, minister pezü aser taoba mapang minister inyaka alir parnok ter dak tali aputsü totuyuba agüja lir.
Iba ajungben inyakyim ya chuba yimli tashi taitba kümdaktsütsü mechi südi, ta nisung aikati ashir.
Prince Mansour ya January aser April, 2015 mapang crown prince alisang aser taoba intelligence nung tekolakba Prince Muqrin bin Abdulaziz’er jabaso lir, saka Prince Mohammed tebo arishi küm 81 tain King Salman-i menden nungi aludaktsü.
Mansour ya tebo indang royal court nung consultant mapa inyaka liasü aser April 2017 nung deputy governor ti shimtetba nung densema liasü.
Prince Mansour den provincial ketdangser tenet densema Deobar abepdang helicopter ka nung Abha yimti tzükümlen aliba project semdanga jajatsü apuso, ta Saudi Press Agency ajanga ashi.
“Kasa anogo nikongdang meyiba aruba mapang tayimtsü den Reda reserve anasa osang ola agitepba sama,” ta kasa osang ajanga ashi. Iba tayimtsü teraksa nguteta lir aser lendong nungi kümzüka ali mali bushiba mapang lir.
Reda ya Sarawat Mountains nung lir aser iba tenem ya Arabian Peninsula nung tuluba lir aser Abha nungi anülulen kilometre 10 bilar aser Yemen den arrtsü nungi kilometre 120 bilar lir.