Yemen nung Houthi temi osangbener aika pua lir

Sanaa, December 06 (Agencies): Yemen yimtiba nung aliba television station ka nung osangbener aika Houthi telungpurtemi pua yua lir aser osangbener temi parnok chioktsü akhanger.
Telungpurtemi Sanaa nung aliba Yemen Al Youm TV channel indang headquarder nung rocket-propelled grenades amshia Honibarnü amak aser ki telungi ia iba station nung inyaker nisung 41 pua ayu, ta Reporters Without Borders (RSF) ajanga ashi.
Iba lendong nung tanüker nisung asem yiru, ta parnokisa ashi.
“Houthis temi osangbener anema iba ama mapa tamajung inyakba onoki aitsür, aser iba inyakyim ajanga Geneva Convention nung aibelener,” ta RSF indang Middle East desk nung tekolakba, Alexandra El Khazen-i ashi.
“Iba ama nisung pua ayuba yimya ajanga Yemen nung osangbener taküm lendong nung aliba sayur. Houthi telungpurtemi tekeraba nung TV channel indang osangbenertem chioktsü ajungshir,” ta Khazen-isa ashi.
Houthis telok ya taoba Yemen Tir Ali Abdullah Saleh den tesendaktep tajung aliba raksar yimtiba nung prangbong aser artillery amshia raraba mapang ka nung osangbenertem merenshiba aser pua ayuba ya adaloker.
Ita tenzüker Sanaa nung raraba mapang nisung 234 tepsetogo aser nisung 400 dak tali yirua lir, ta International Committee of the Red Cross (ICRC) ajanga Mongulbarnü ashi.
Saleh indang gari nung RPG ka Hombarnü khaloktsü aser iba sülen pa khaset, saka pa ya par kidang tepset, ta osang kar ajanga ashir. Saka Saleh asüba ajanga küm asem jungnüa raraba nung nisung 10,000 taküm samar aliba linük nung kechi adaloktsü, ta tasüngdangba arur.
Yemen Al Youm TV ya Saleh’er General People’s Congress telok den sendaktepa lir.
Houthis temi TV channel indang ‘access code’ ya tashiyim agi osangbener dang nungi rakzüker parnok indang osang sangdong, ya RSF osang ajanga ashi.
Yemen nung tang tashi Houthis aser al-Qaeda temi osangbener aser media nung mapa inyaker 13 pua lir.
RSF indang 2017 World Press Freedom Index nung linük 180 nungi Yemen ya jenjang 166buba nung lir.